Skrifað hefur verið undir samning þess efni að byggingfyrirtækið Modulus byggi 33 nýjar leiguíbúðir í þremur húsum við Asparskóga 12, 14 og 16 á Akranesi fyrir Bjarg íbúðafélag. Gert er ráð fyrir að framkvæmdir hefjist í haust og að íbúðum verði skilað fullkláruðum, þeim fyrstu 22 um miðjan maí á næsta ári en síðustu ellefu mánuði síðar. Arkitekt að byggingunum er Svava Björg Jónsdóttir.

Bjarg íbúðafélag er eins og kunnugt er húsnæðissjálfseignarstofnun stofnuð af ASÍ og BSRB. Félagið er rekið án hagnaðarmarkmiða og er ætlað að tryggja tekjulágum fjölskyldum á vinnumarkaði aðgengi að öruggu íbúðarhúsnæði í langtímaleigu. Fram hefur komið að Bjarg stefnir á að byggja um 1400 leiguíbúðir á fjórum árum. Nýverið kom fram í frétt Skessuhorns að Bjarg hefur gert áætlanir um leiguverð fyrir íbúðir félagsins meðal annars á Akranesi. Áætlun um leigu miðast við verðlag 2018 og áætlanir félagsins um byggingakostnað, vaxtakostnað og kostnað vegna reksturs fasteignanna. Endanlegt leiguverð verður gefið út þegar íbúðir verða fullbúnar og mun það taka mið af endanlegum byggingarkostnaði. Áhugasamir geta þó miðað við eftirfarandi forsendur, samkvæmt upplýsingum Bjargs:

Áætlað leiguverð

„Áætlað leiguverð 2ja herbergja íbúðar er frá 96 þúsund til 130 þúsund miðað við rekstrarforsendur og verðlag 2018. Greiðslubyrgði leigu miðað við lágmarkslaun gæti orðið frá 55.000 fyrir einstakling þegar tekið er tillit til húsnæðisbóta.

Áætlað leiguverð 3ja herbergja íbúðar er frá 128 þúsund til 169 þúsund miðað við rekstrarforsendur og verðlag 2018. Greiðslubyrgði leigu miðað við lágmarkslaun gæti orðið frá 90.000 fyrir hjón/par með eitt barn þegar tekið er tillit til húsnæðisbóta.

Áætlað leiguverð á 4ja herbergja íbúðar er frá 146 þúsund til 200 þúsund miðað við rekstrarforsendur og verðlag 2018. Greiðslubyrgði leigu miðað við lágmarkslaun gæti orðið frá 99.000 fyrir hjón/par með 2 börn þegar tekið er tillit til húsnæðisbóta.“

Allir fermetrar nýttir

Við hönnun íbúða Bjargs var leitast við að ná góðri nýtingu á íbúðarfermetrum og með færri fermetrum getur félagið boðið lægra heildarleiguverð til leigutaka. Það er m.a. gert með því að nýta ný ákvæði í byggingareglugerð varðandi stærðir rýma og útfærslur á geymslum. Stefnt er á að allir fermetrar nýtist og séu innan íbúðar en liggi ekki að hluta til í geymslum í kjallara eins og algengt er. Meðalstærð tveggja herbergja íbúðar er um 45 fermetrar, þriggja herbergja íbúð er um 70 fermetrar og fjögurra herbergja íbúð um 85 fermetrar.

Umsókn fer fram í tveimur skrefum

Opið er fyrir skráningu á biðlista hjá Bjargi og fer hún fer fram rafrænt á www.bjargibudafelag.is. Íbúðir verða auglýstar til leigu í áföngum og mun þá verða hægt að sækja um ákveðnar staðsetningar. Staða á biðlista ræður til um úthlutun.

Samið um byggingu félagslegra íbúða á Akranesi