Um Verstlunarmannahelgina verður 21. Unglingalandsmót UMFÍ haldið í Þorlákshöfn. Mótshaldarar eru Héraðssambandið Skarphéðinn (HSK) og sveitarfélagið Ölfus auk Ungmennafélags Íslands (UMFÍ). Ómar Bragi Stefánsson, framkvæmdastjóri Unglingalandsmóts UMFÍ, segir meiri fjölbreytni á mótinu nú en nokkru sinni áður. Það veiti öllum þátttakendum tækifæri til að prófa spennandi greinar en meðal annars verður keppt í knattspyrnu, körfubolta og frjálsum íþróttum. Á meðal nýrra greina nú eru keppni í dorgveiði og sandkastalagerð. Keppni í kökuskreytingum er einnig á dagskránni.

„Við sáum það á Egilsstöðum að þátttakendur á Unglingalandsmótum vilja fjölbreytni og nýjungar. Við svörum að sjálfsögðu því kalli,“ segir Ómar Bragi og bætir við að greinarnar flestar eru til þess fallnar að vinir og vinkonur geti búið til lið saman. Allir geta skráð sig til leiks.

Fjölbreytt dagskrá og afþreying

Þétt dagskrá er alla mótsdagana og skemmtun á kvöldin þar sem margt af þekktasta tónlistarfólki landsins kemur fram. Þegar hafa boðað komu sína Jói Pé og Króli, Herra Hnetusmjör, Flóni og Huginn, Jón Jónsson og hljómsveitin Between Mountains, Young Karin, Míó Tríó, DJ Dóra Júlía og fleiri.

Vímulaus fjölskylduhátíð

Unglingalandsmót UMFÍ er vímulaus fjölskylduhátíð þar sem börn og ungmenni á aldrinum 11–18 ára reyna með sér í fjölmörgum íþróttagreinum en samhliða er boðið upp á fjölbreytta afþreyingu, leiki og skemmtun fyrir alla fjölskylduna. Búist er við ótrúlegum fjölda barna og ungmenna ásamt fjölskyldum þeirra á mótið. Ekki er skilyrði að vera skráður í ungmenna- eða íþróttafélag til þess að taka þátt á Unglingalandsmóti UMFÍ. Skráningargjald á Unglingalandsmót UMFÍ er 7.000 krónur og geta allir sem vilja skráð sig til leiks. Greiða þarf gjaldið til að geta klárað skráningu. Aðrir mótsgestir greiða ekkert gjald en geta þó tekið þátt í fjölbreyttri afþreyingu og verkefnum sem boðið er upp á.

Unglingalandsmót UMFÍ um verslunarmannahelgina