Samkvæmt venju verður árleg Reykholtshátíð haldin síðustu helgina í júlí, sem nú er framundan. Saman fléttast þá og blómstra sterkir þræðir staðarins, tónlist í sögulegu umhverfi, fræðastarf Snorrastofu og helgihald Reykholtskirkju. Fyrirlestur Snorrastofu á hátíðinni er í höndum dr. Ólínu Þorvarðardóttur þjóðfræðings, laugardaginn 28. júlí kl. 13, Nefnist hann: “Fyrsti blaðamaðurinn – fyrstur til margs. Um náttúrur Jóns lærða.” Hann verður í Bókhlöðu Snorrastofu.

Um efni fyrirlestursins segir: 17. aldar alþýðufræðimaðurinn Jón lærði Guðmundsson var í reynd fyrsti blaðamaðurinn á Íslandi. Hann mætti jafnvel nefna fyrsta þjóðfræðinginn. Þekktastur var hann þó sem draugabani og að kunna sitthvað fyrir sér í lækningum og teikningu. Líf hans var mikil hrakfallasaga eftir að hann blandaðist inn í eftirmál Spánverjavíganna 1615, enda lifði hann á tímum galdraótta og óþróaðs réttarfars sem hafði áhrif á ævigöngu hans og afdrif. Í fyrirlestrinum verður fjallað um ímynd og hlutverk þessa sérstæða og fróðleiksfúsa manns sem þurfti að fóta sig í samfélagi fáfræði og fátæktar í margvíslegum skilningi.

Ólína Kjerúlf Þorvarðardóttir lauk doktorsprófi frá Háskóla Íslands árið 2000 með doktorsritgerð sinni; Brennuöldin. Galdur og galdratrú í málskjölum og munnmæum. Ólína hefur gengt ýmsum störfum m.a. sem háskólakennari, skólameistri og alþingismaður en hefur jafnhliða helgað sig rit- og fræðastörfum. Hún á að baki útgefnar fræðibækur, auk földa fræðigreina og fyrirlestra um íslensk fræði.

Opnunartónleikar Reykholtshátíðar verða föstudagskvöldið 27. júlí kl. 20. Sama dag, laugardag kl. 16 verða fluttar íslenskar kórperlur á fullveldisafmæli og kl. 20 eru kammertónleikarnir, Mozart og Bartók. Á sunnudeginum 29. júlí verður hátíðarguðsþjónusta á kirkjudegi kl. 14 og lokatónleikar hátíðarinnar kl. 16: Hátíðartónleikar: Fullveldi í 100 ár – íslensk kammertónlist frá 1918 til 2018.

Snorrastofa hvetur alla til að leggja leið sína í Reykholt og njóta þess sem staðurinn hefur uppá að bjóða. Um dagskrá hátíðarinnar má lesa nánar á heimasíðu Reykholtshátíðar og Snorrastofu.

-fréttatilkynning

Fræðin fléttast við Reykholtshátíð