Fyrirlestur og sýning að Nýp á Skarðsströnd

Næstkomandi laugardag klukkan 15 mun Helga Kress, prófessor emeritus við Háskóla Íslands, flytja erindi að Nýp á Skarðsströnd í Dölum. Erindið kallar hún Blómmóðir besta. Sögð verður saga konunnar í lífi og ljóði Jóns Thoroddsen: Kristínar Ólínu Thoroddsen, sem fædd var Sívertsen (1833-1879). Sagan verður sögð út frá bréfaskriftum. Í erindi sínu tengir Helga kvenlýsingar í ljóðum og sögum Jóns Thoroddsen við konurnar í lífi hans. „Helga hefur m.a. skoðað móðurmyndina í ljóðum Jóns og borið hana saman við móður barna þeirra hjóna. Helga byggir erindið að hluta til á bréfum sem Kristín skrifaði eftir lát Jóns. Einnig kemur við sögu systir Kristínar sem að nokkru leyti var uppeldismóðir fjögurra sona Kristínar og Jóns,“ segir í tilkynningu.

 

Sýning um hönnun og endurbyggingu húsa

Jafnframt má geta þess að sunnudaginn 8. júlí var opnuð sýning að Nýp í nýju sýningarrými og er sýningin opin til sumarloka, skv. samkomulagi. Sýningin nefnist Ný hönnun og endurbygging á Skarðsströnd. „Í vetur hafa staðið yfir framkvæmdir að Nýp. Í viðbyggingu við íbúðarhúsið, þar sem áður var fjós, fjárhús og hesthús, hafa arkítektarnir í Studio Bua hannað gesta- og sýningarými. Sýnir hún hönnun endurbyggingarinnar í teikningum, ljósmyndum og módelum, ásamt nokkrum eldri ljósmyndum af húsinu. Í hönnun byggingarinnar var lögð áhersla á að nýta upprunalega steinveggi og gera þá sýnilega sem burðarvirki í rýminu. Efnisnotkunin opinberar „lifandi og hrátt,“ efni sem áhugavert fyrirbæri í sjálfu sér sem hefur fagurfræðilegt gildi. Verkefnið var framkvæmt af smiðum, iðnaðarmönnum og handverksfólki í heimabyggð.“

Líkar þetta

Fleiri fréttir

Slasaðist við Glym

Björgunarsveitir á Vesturlandi voru kallaðar út rétt fyrir klukkan átta í gærkvöldi. Ungur karlmaður hafði hrasað og dottið illa í... Lesa meira