Ljósm. af síðu Icelandic Documentary Film Festival.

Fyrsta alþjóðlega heimildamyndahátíðin kynnt á fimmtudaginn

Icelandic Documentary Film Festival er ný alþjóðleg heimildamyndahátíð sem haldin verður í fyrst sinn á Akranesi í júlí á næsta ári. Eru það Ingibjörg Halldórsdóttir, Heiðar Mar Björnsson og Hallur Örn Árnason sem standa að hátíðinni og að sögn Ingibjargar er tilgangurinn meðal annars að auðga kvikmyndamenningu hér á landi. „Við viljum opna huga Íslendinga fyrir heimildamyndum og í raun bara auka veg og virðingu heimildamynda í íslensku kvikmyndalandslagi,“ segir Ingibjörg í samtali við blaðamann Skessuhorns.

„Það er því miður þannig hér á landi að heimildamyndir enda oft eingöngu í sjónvarpi eða á Netflix. Það hefur verið erfitt að nálgast þessar myndir í góðum gæðum í bíósölum,“ bætir hún við. Ingibjörg segir jafnframt að markmiðið sé að hátíðin verði árlegur viðburður sem fólk um allan heim muni sækja. „Flest stærri lönd halda alþjóðlegar kvikmyndahátíðir og okkur langar að koma slíku upp hér líka. Þá vildum við ekki hafa hátíðina á höfuðborgarsvæðinu og var Akranes upplagður staður,“ segir hún.

Aðspurð hvernig myndir verða sýndar segir Ingibjörg allar heimildamyndir koma til greina. „Við stefnum á að sýna um 20 titla á hátíðinni, sem mun standa yfir í fimm daga. Það koma í raun og veru allar heimildamyndir sem framleiddar eru fyrir bíó til greina, allt frá skemmtilegum og léttum myndum yfir í myndir sem fjalla um þyngri málefni. Við erum komin með ágætt langtímaplan fyrir hátíðina og erum mjög bjartsýn að hún verði vel sótt og fólk verði ánægt,“ segir hún og bætir því við að á hátíðinni stefni þau einnig á að hafa vinnustofur fyrir kvikmyndagerðamenn samhliða hátíðinni og létta sérviðburði.

 

Hátíðin kynnt á morgun

Fyrir áhugasama verður hægt að fá smjörþef af hátíðinni á Írskum dögum næstkomandi fimmtudag. Þá verður heimildamyndin School Life sýnd í Bíóhöllinni á Akranesi. Áður en myndin verður látin rúlla munu aðstandendur hátíðarinnar kynna verkefnið fyrir gestum og Dóra Jóhannsdóttir verður kynnir kvöldsins. Að sýningu lokinni verður Pub Quiz með Jóhanni Alfreð á Gamla Kaupfélaginu.

Líkar þetta

Fleiri fréttir