medium

large

thumbnail

1536x1536

2048x2048

small

custom-size

Hafnarstjórinn sem hefði getað orðið prestur

„Að vera á sjó var eins og hver önnur vinna“

Mikilvæg lífæð fyrir fólkið hér á svæðinu

Íbúafundur Miðbæjarsamtakanna í Tónbergi á mánudaginn

Viðunandi útkoma Dalabyggðar á síðasta ári

Óbyggðanefnd framlengir frest vegna eyja og skerja

core/freeform

Landsmót hestamanna hefst á sunnudaginn, 1. júlí, á keppnissvæði Fáks í Víðidal í Reykjavík og er eftirvæntingin mikil meðal hestamanna og áhugafólks um íslenska hestinn. Þar verður glæsileg gæðingakeppni þar sem bestu knapar og hestar landsins etja kappi og sýnd fremstu kynbótahross landsins. Jafnframt verður boðið upp á fjölbreytta fræðslu- og skemmtidagskrá fyrir börn og fullorðna alla daga fram að mótslokum, sunnudaginn 8. júlí.

Von á 10-12.000 gestum

Landsmót eru stærstu viðburðir sem haldnir eru hérlendis í kringum íslenska hestinn. Fjöldi erlendra gesta sækir landið sérstaklega heim til að mæta á Landsmót en alls er búist við um 10.000 gestum á mótið í ár, þar af um fjórðungi erlendis frá. Mótið, sem er það 23. í röðinni er nú haldið í Reykjavík í þriðja sinn en þar hafa áður verið haldin mót árin 2000 og 2012.

Töluverðar endurbætur hafa verið gerðar á mótssvæðinu í Víðidal frá síðasta Landsmóti og öll aðstaða á svæðinu til fyrirmyndar. Af einstökum framkvæmdum má nefna að lögð hefur verið ný kynbótabraut sem liggur nær áhorfendabrekku. Jafnframt var útbúin önnur áhorfendabrekka við aðalvöllinn, sem skapar þar enn meiri stemningu.

Bestu hestar landsins saman komnir

Á Landsmóti koma saman bestu hestar landsins til keppni og sýninga, auk þess sem þar fara fram kappreiðar, töltkeppni, heiðursverðlaunasýningar kynbótahrossa og sýningar ræktunarbúa. Margir bíða eftirvæntingarfullir eftir sýningu kynbótahrossa, enda hafa þegar verið slegin tvö heimsmet á kynbótasýningum í aðdraganda mótsins. Alls eiga 132 hross rétt til þátttöku í fullorðinsflokkum í gæðingakeppninni og er það um 15% aukning frá síðasta Landsmóti á Hólum 2016.

Keppni í barna- og unglingaflokkum hefst strax á sunnudag, á fyrsta degi mótsins og fyrri umferð kappreiða er á þriðjudagskvöldinu. Formleg mótssetning er kl. 19:30-20:00, fimmtudaginn 5. júlí með hópreið þátttakenda frá öllum hestamannafélögunum á Landsmóti. Að setningarathöfn lokinni hefst forkeppni í tölti. Seinni umferð kappreiða er síðdegis föstudaginn 6. júlí, stuttu síðar verður tilkynnt um verðlaun fyrir kynbótahryssur og sama kvöld fer fram sýning ræktunarbúa. Um hádegi laugardaginn 7. júlí verður tilkynnt hvaða stóðhestar fá verðlaun og í framhaldi af því verður tilkynnt um heiðursverðlaunahesta. Besta ræktunarbúið verður verðlaunað upp úr kl. 19 á laugardeginum og Sleipnisbikarinn sem er veittur þeim hesti sem hlýtur heiðursverðlaun fyrir afkvæmi verður afhentur stuttu síðar, svo fátt eitt sé nefnt að því sem fram fer, en mótslok eru kl. 16, sunnudaginn 8. júlí.

Fjölbreytt og fræðandi

Það verða ekki bara frábærir hestar og knapar sem láta til sín taka á Landsmótinu. Í sýningartjaldi Horses of Iceland verkefnisins verður daglega boðið upp á fjölbreytta og áhugaverða fræðsludagskrá um margvísleg efni tengd íslenska hestinum. Má þar m.a. nefna kynningar á knapamerkjakerfinu, járningum og áhrifum skeiðgensins á ganghæfi íslenskra hrossa. Einnig rannsókn á líkamlegum mælingum á knöpum, sýnikennslu á mismunandi tamningar- og þjálfunarstigum hrossa, ásamt fyrirlestum um fóðrun, bæði hesta almennt á Íslandi, sem og keppnis- og reiðhesta, folaldsmera og folalda.

Sveitaböll, gítarpartý og sérstakur fjölskyldudagur

Tónlistin er aldrei langt undan þegar hestafólk kemur saman og á Landsmóti verða alvöru sveitaböll á bæði föstudags- og laugardagskvöld og gítarpartý á hverju kvöldi frá þriðjudegi til laugardags. Þar troða upp Grétar og Hebbi, Stebbi Jak, Sigvaldi Helgi, Salka Sól og Magni Ásgeirsson, sem jafnframt er tónlistarstjóri mótsins. Á kántrítónleikum og dansleik í Reiðhöllinni á föstudagskvöldinu halda uppi fjörinu Axel Ó &amp; Co, ásamt Rúnari F, Helga Björns og Reiðmönnum vindanna. Hljómsveitin Albatross spilar svo á stórdansleiknum í Reiðhöllinni á laugardagskvöld, ásamt hinum valinkunnu söngvurum Sverri Bermann, Magna, Sölku Sól og Röggu Gísla.

Sérstök leiksvæði, með hoppuköstulum og fleiru skemmtilegu fyrir börnin, eru opin alla mótsdagana. Leikhópurinn Lotta lítur í heimsókn í Mathöllina í Reiðhöllinni kl. 14 á fyrsta degi mótsins, sunnudaginn 1. júlí, sem er sérstakur fjölskyldudagur og frítt inn á mótið þann dag fyrir alla. Rappararnir vinsælu, Jói Pé og Króli, verða einnig á svæðinu á fjölskyldudeginum og koma fram á balli fyrir börnin í Reiðhöllinni/Mathöll sem hefst kl. 19.

Mathöll í Reiðhöllinni og HM á risaskjá

Enginn verður svangur á Landsmótinu því Reiðhöllinni verður breytt í í sannkallaða Mathöll mótsdagana. Bæði inni og á sölustöðum utan við höllina, þar sem fjölbreytt úrval af götumat verður í boði, ættu því allir að geta fundið mat við sitt hæfi.

Þá geta þeir sem eiga erfitt með að velja á milli Landsmóts og HM í Rússlandi andað léttar því sýnt verður beint frá bæði 16 og 8 liða úrslitum HM á 15 fermetra risaskjá í tjaldi á mótssvæðinu. Þess á milli verður svo hægt að fylgjast með streymi frá keppni á Landsmótinu á risaskjánum.

825 fermetra markaðstjald og tjaldstæði fyrir þá sem vilja

Áhugafólk um verslun og viðskipti á að finna eitthvað við sitt hæfi í rúmlega 800 fermetra markaðstjaldi Landsmótsins í Víðidal. Það verður staðsett fyrir ofan aðaláhorfendabrekkuna og því auðvelt fyrir gesti að bregða sér þangað á milli atriða á keppnisvellinum. Allt sýningarpláss í markaðstjaldinu er þegar uppbókað og hafa um 30 aðilar, bæði innlendir og erlendir, tryggt sér aðstöðu þar til að selja margskonar varning, bæði hestatengdan og ekki, frá kl. 11 alla daga meðan Landsmót stendur.

Tjaldsstæði standa öllum mótsgestum til boða auk þess sem gestir geta keypt aðgang að ákveðnum tjaldstæðareitum þar sem aðgengi er að rafmagni.

Miðasala á Landsmót stendur yfir á vefnum landsmot.is og tix.is. Hægt er að kaupa bæði viku- og helgarpassa og einnig dagsmiða, sem gilda einn ákveðinn dag.

Eitthvað fyrir alla á Landsmóti hestamanna í Víðidal