Mikil gleði ríkti þegar búið var að háfa fyrsta laxinn. Þórunn úti í ánni neðan við Laxfoss ásamt aðstoðarmönnum sínum. Ljósm. Skessuhorn/mm

Þórunn formaður LEB veiddi fyrsta fisk sumarsins

Það ríkti ró og friður, bæði í veðri og meðal fólks, þegar rennt var fyrir fyrstu laxa sumarsins í Norðurá í Borgarfirði í morgun. Stjórn veiðifélagsins bauð til morgunverðar í veiðihúsinu við Rjúpnahæð klukkan sjö en eftir það tóku veiðimenn að ferðbúast að ánni. Hefð er fyrir því að bjóða fulltrúum ólíkra hópa að renna fyrir fyrstu fiskana. Í fyrra voru það t.d. landsliðsmenn í knattspyrnu semi hófu veiðar og Gylfi Sigurðsson veiddi fyrsta laxinn sællar minningar. Að þessu sinni var boðið að hefja veiðarnar þeim Sindra Sigurgeirssyni formanni Bændasamtaka Íslands og Þórunni Sveinbjörnsdóttur formanni Landssambands eldri borgara. Einar Sigfússon, sem sér um sölu veiðileyfa í Norður, sagði þau tvö hafa verið valin vegna þess hversu vel þau hafa staðið sig í réttindabaráttu og hagsmunagæslu fyrir samtökin sem þau veita forstöðu. Bændasamtökin hafa unnið ötullega að boðskap þess að láta innlenda og ómengaða framleiðslu matvæla vera í öndvegi. Þá hafa Landssamtök eldri borgara barist fyrir réttindum eldri borgara sem kemur jú öllum til góðs þegar aldurinn færist yfir.

Þau Sindri og Þórunn hófu veiðarnar neðan við hinn ægifagra Laxfoss. Áin er vatnsmikil og hitastig vatnsins var sjö gráður og því viðbúið að laxinn lægi niður við botninn. Mikil spenna lá í loftinu en taldir höfðu verið fjórtán laxar í Brotinu kvöldið áður þannig að almennt töldu menn fullvíst að ekki þyrfti lengi að bíða þess að fyrsti laxinn biti á. Sú varð og raunin. Sindri setti í lax á Brotinu laust fyrir hálf níu, eftir tíu mínútna æfingaköst, og glímdi hann drykklanga stund við fiskinn. Litlu ofar í ánni renndi Þórunn flotlínunni og fljótlega beit einnig á hjá henni. Spenna ríkti því um hvort þeirra landaði fyrsta laxi sumarsins. Skömmu fyrir löndun slitnaði hins vegar af hjá Sindra en Þórunn landaði 70 cm, tíu punda glansandi hrygnu við mikinn fögnuð viðstaddra. Reyndar kom í ljós að veiðimenn sem hófu einnig veiðar á sama tíma klukkan 8 höfðu sett í fiska um nokkrum mínútum áður. Hermann Sveinsen á því formlega fyrsta lax sumarsins sem hann veiddi í Stokkhylsbrotinu. Ljóst er að áin er vatnsmikil og full af laxi. Því ríkir bjartsýni meðal veiðimanna þennan fyrsta veiðidag.

Þórunn Sveinbjörnsdóttir var að vonum glöð með fiskinn og þessa stund við ána. Hún segist lítið hafa stundað laxveiðar í seinni tíð og síðast veiddi hún í Norðurá fyrir réttum fimmtíu árum. Hún byggir þó á reynslu frá veiðum í Straumfjarðará og víðar við silungsveiðiar, en hún er ættuð frá Hrísdal í Eyja- og Miklaholtshreppi og á fjölda skyldfólks víða á svæðinu.

Líkar þetta

Fleiri fréttir