Hlutu viðurkenningu fyrir störf í þágu barna

Alþjóðlegur dagur fjölskyldunnar var í gær. Af því tilefni var hin árlega fjölskylduviðurkenning SOS Barnaþorpanna afhent. Með henni vilja SOS Barnaþorpin vekja athygli á einstaklingum, hópum, fyrirtækjum eða samtökum sem starfa í þágu fjölskyldna á Íslandi og hafa velferð barna í fyrirrúmi. Í ár heiðra samtökin kennara í leikskólum, grunnskólum og framhaldsskólum fyrir störf þeirra í þágu velferðar nemenda sinna. Veittu fulltrúar allra skólastiga á landinu verðlaunum viðtöku. Meðal þeirra var Vilborg Guðný Valgeirsdóttir frá leikskólanum Vallarseli á Akranesi, en leikskólinn hefur verið í fararbroddi á ýmsum sviðum, meðal annars í þjónustu við börn nýbúa. Á meðfylgjandi mynd er Vilborg þriðja frá vinstri.

„Þetta er viðurkenning fyrir óeigingjarnt starf í þágu fjölskyldna sem jafnvel er unnið utan hefðbundins vinnutíma og felst í samtölum við foreldra, ráðgjöf, aðkomu að fjölskylduvandamálum og heimanámi, koma málum í farveg o.m.fl. til að styðja við fjölskylduna.“ segir í umsögn valnefndarinnar.

Líkar þetta

Fleiri fréttir