Útsýnispallur í Búðardal. Ljósm. úr safni/sm.

Persónukjör verður að nýju í Dalabyggð

Framboðsfrestur vegna sveitarstjórnarkosninganna 26. maí rann út á hádegi í dag. Engir framboðslistar bárust kjörstjórn Dalabyggðar fyrir þann tíma og verða því óbundnar kosningar (persónukjör) í sveitarfélaginu 26. maí næstkomandi eins og fyrir fjórum árum. Allir kjósendur sveitarfélagsins verða því í kjöri, nema þeir sem löglega eru undanþegnir skyldu til að taka kjöri. Tvær beiðnir um undanþágu bárust kjörstjórn, segir í tilkynningu frá kjörstjórn á vef Dalabyggðar. Þær eru frá Höllu Sigríði Steinólfsdóttur í Ytri-Fagradal og Ingveldi Guðmundsdóttur í Stórholti. Báðar hafa þær setið í sveitarstjórn í 12 ár og uppfylla því skilyrði um að biðjast undan endurkjöri. „Óski fleiri eftir að verða undanþegnir skyldu að taka sæti í sveitarstjórn skulu þeir hafa samband við Svein Gestsson formann kjörstjórnar,“ segir í tilkynningu kjörstjórnar.

Líkar þetta

Fleiri fréttir