„Knattspyrnan á Akranesi á sér langa og farsæla sögu en síðustu ár hefur gengi félagsins ekki verið í samræmi við væntingar stuðningsfólks. Við Skagamenn höfum metnað til komast aftur á sigurslóð og því er nauðsynlegt að blása til sóknar,“ segir í bréfi sem hópur Skagamanna hefur sent stuðningsfólki knattspyrnufélagsins í þeim tilgangi að stofnað verði styrktarfélagið Sterkir Skagamenn. Formlegur stofnfundur félagsins verður að Jaðarsbökkum miðvikudaginn 11. apríl kl. 20.00.

„Þrátt fyrir rysjótt gengi hefur margt jákvætt átt sér stað á Skaganum síðustu ár. Aðstaðan til knattspyrnuiðkunar hefur hægt og bítandi verið bætt þó svo að ýmis verkefni séu framundan. Iðkendum hefur fjölgað, á ný hefur unglingalandsliðsmönnum fjölgað og liðin okkar eru að lang stærstum hluta skipuð efnilegum heimamönnum. Þá hafa nýverið tveir Skagamenn haldið í atvinnumennsku til Svíþjóðar. Allt eru þetta merki um að unglingastarfið sé að bera ávöxt. Það breytir hins vegar ekki því að erfiðlega hefur gengið að tefla fram nægjanlega öflugu liði til að koma Skaganum á þann stað sem við viljum sjá liðið.“

Á undanförnum vikum hafa nokkrir einstaklingar hist, sem eiga sterkar tengingar við fótboltann á Akranesi. Umræðan í þeim hópi hefur snúist um; „hvað við getum lagt að mörkum til að styrkja það góða starf sem unnið er af stjórn Knattspyrnufélags ÍA“. Niðurstaðan af því spjalli er að þeir sem láta sig fótboltann á Skaganum varða myndi með sér félagsskap sem geti orðið kröftugur fjárhagslegur og félagslegur stuðningsaðili og bakhjarl Knattspyrnufélags ÍA,“ segir í kynningarbréfinu. „Með falli meistaraflokks karla úr efstu deild á síðasta hausti og samdrætti í öflun tekna frá styrktaraðilum er mikið skarð höggvið í fjárhagsgetu félagsins. Því er þörf á sterkum bakhjörlum ef byggja á upp öflugt lið til lengri tíma. Þá skiptir einnig máli að svona félagsskapur hafi félagslegt gildi þar sem félagsmenn hittist og njóti samvista hver við annan.

Félagsgjald 100 þúsund krónur

Lagt er upp með metnaðarfull markmið í þessum hugmyndum. Gert er ráð fyrir að hver einstaklingur greiði árlega 100.000 krónur á ári, sem að öllu leyti verði ráðstafað til stjórnar Knattspyrnufélags ÍA. „Í boði er að dreifa greiðslum yfir 12 mánuði. Innifalið í þessu gjaldi verði verður miði á alla leiki meistaraflokka karla og kvenna, þar sem hver félagsmaður getur boðið einum gesti með sér. Þá mun félagsskapurinn standa fyrir móttökum fyrir leiki á Íslandsmóti meistaraflokks. Einnig má hugsa sér ýmsa aðra viðburði þessu tengdu en það ræðst auðvitað af vilja félagsmanna.“

Loks segir að það sé verðugt verkefni að koma knattspyrnunni á Akranesi að nýju í fremstu röð og sanna að hægt sé að byggja árangur á uppeldisstarfi félagsins. „Til þess að slíkt verkefni takist þarf breiðfylkingu þeirra sem hafa stutt félagið um árabil og eru tilbúnir til þess að vera virkir þátttakendur í stuðningi við félagið. Það er einlæg ósk okkar sem að þessu standa að þú kæri stuðningsmaður sjáir þér fært að leggja þessu málefni lið.“

Til að ganga til liðs við þennan væntanlega félagsskap er unnt að senda tölvupóst á sterkirskagamenn@kfia.is, eða senda inn tilkynningu á facebook síðu félagsins og þá mun einhver af neðangreindum hafa samband við viðkomandi til að ganga frá skráningu.“

Að Sterkum Skagamönnum standa eftirtaldir einstaklingar: Alfreð Freyr Karlsson, Arnór Smárason, Björn Bergmann Sigurðarson, Brynjólfur Guðmundsson, Dýrfinna Torfadóttir, Einar Brandsson, Gísli Gíslason, Gunnar Sigurðsson, Hannes Birgisson, Haraldur Ingólfsson, Haraldur Sturlaugsson, Heimir Fannar Gunnlaugsson, Katla Hallsdóttir, Magnús Brandsson, Magnús Guðmundsson, Ólafur Adolfsson, Smári Guðjónsson, Sturlaugur Haraldsson, Sævar Freyr Þráinsson, Þórður Guðjónsson og Örn Gunnarsson.

Undirbúa stofnun Sterkra Skagamanna