Síðastliðinn fimmtudag var tilkynnt um úthlutun ríkisstyrkja upp á 2,8 milljarða króna til uppbyggingar innviða og annarra verkefna á fjölsóttum stöðum í náttúru Íslands og á ferðamannastöðum. Það voru Guðmundur Ingi Guðbrandsson, umhverfis- og auðlindaráðherra og Þórdís Kolbrún Reykfjörð Gylfadóttir, ferðamála- iðnaðar- og nýsköpunarráðherra, sem tilkynntu um styrkina. Annars vegar er um að ræða 722 milljóna króna úthlutun úr Framkvæmdasjóði ferðamannastaða fyrir árið 2018 og hins vegar tæplega 2,1 milljarða króna úthlutun vegna þriggja ára verkefnaáætlunar landsáætlunar um uppbyggingu innviða sem gildir fyrir árin 2018-2020. Á Vesturland er veitt tæpri 81 milljón úr Framkvæmdasjóði ferðamannastaða, en til verndar náttúru er í landshlutann veitt 158,7 milljónum til alls ellefu verkefna. Stærstu styrkirnir eru til Umhverfisstofnunar vegna Djúpalónssands 63 milljónir og Malarrifs 40 milljónir.

Þetta er í fyrsta sinn sem Framkvæmdasjóður ferðamannastaða styrkir ekki ferðamannastaði í eigu ríkisins og er það í samræmi við breytta löggjöf um sjóðinn. Alls hljóta 56 staðir styrk úr sjóðnum að þessu sinni. Sérstök áhersla er lögð á að fjölga viðkomustöðum ferðamanna til að stuðla að því að álag minnki á fjölsóttum stöðum og lýtur 21 verkefni að þessu markmiði.

Nú var í fyrsta sinn úthlutað vegna þriggja ára verkefnaáætlunar landsáætlunar um uppbyggingu innviða sem gildir fyrir árin 2018 – 2020. Verkefnaáætlunin tekur m.a. til friðlýstra svæða og fjölsóttra staða í eigu íslenska ríkisins, valinna svæða sveitarfélaga auk landvörslu. Þá er fé veitt til óstaðbundinna áhersluverkefna. Alls er fjármagni veitt á 71 stað og eina gönguleið til fjölbreyttra verkefna, með sérstaka áherslu á vernd náttúru, minjavernd, bætt öryggi, svo og bætta aðstöðu fyrir gesti á þessu stöðum.

Sjá nánar í frétt Skessuhorns.

Fjórir styrkir til sveitarfélaga

Sveitarfélögin Akraneskaupstaður, Grundarfjarðarbær, Hvalfjarðarsveit og Snæfellsbær hljóta styrki úr Framkvæmdasjóði ferðamannastaða. Akraneskaupstaður fær 11,1 milljón vegna Vitastígs á Breiðinni. Langstærsta styrkinn í landshlutanum fær Grundarfjarðarbær, alls tæpar 62 milljónir króna, vegna uppbyggingar ferðamannastaðar við Kirkjufellsfoss, til að gera bílastæði auk nýrrar gönguleiðar og áningarstaðar. Þá fær Hvalfjarðarsveit 5,1 milljón til að styrkja og viðhalda gönguleið upp að Glymi í Botnsdal. Loks fær Snæfellsbær 2,6 milljónir vegna skipulags og hönnunar á Hellnum við Gróuhól.

Styrkja uppbyggingu ferðamannastaða