Svipmynd úr framhaldsskóla á Vesturlandi, ótengt efni fréttarinnar. Ljósm. úr safni.

Samningaviðræður framhaldsskólakennara eru í uppnámi

Félag framhaldsskólakennara hefur kallað samninganefnd félagsins saman næstkomandi mánudag 26. mars. Þar mun nefndin fara yfir stöðuna í yfirstandandi kjarasamningaviðræðum félagsins. „Eftir fund hjá Ríkissáttasemjara í morgun er þungt hljóð í forystu félagsins. Á mánudag mun nefndin fara yfir næstu skref en þegar hefur formanni verið falið að kalla, strax eftir páska, saman trúnaðarmenn framhaldsskólanna og fara yfir stöðuna,“ segir í tilkynningu frá félaginu. Tekist er á um fullar efndir á kjarasamningi aðila frá 2014 og strandar á fjármögnun til framhaldsskólanna svo efna megi samningsbundin ákvæði í tengslum við nýtt vinnumat og meginbreytingar á fyrirkomulagi náms í framhaldsskólum.

„Það er sérkennilegt að á sama tíma og menntamálaráðherra fullyrðir að framlög til framhaldsskólanna hafi aukist um 1.290 milljónir strandi kjarasamningur félagsmanna á vanefndum ráðuneytisins, meðal annars vegna fjárskorts. Nú er þolinmæði okkar þrotin og það er alveg ljóst að við munum ekki ganga frá þessu samningaborði fyrr en við höfum fengið fullar efndir á fyrri samningi. Hafa ber í huga að við erum með úrskurð Félagsdóms til staðfestingar því sem er umsamið og óefnt,“ segir Guðríður Arnardóttir, formaður Félags framhaldsskólakennara.

Líkar þetta

Fleiri fréttir