Guttarnir. Ljósm. ij.

Rollukarlar meistarar fyrir misskilning – Guttarnir völtuðu yfir þá

Vissulega kemur það fyrir að Skessuhorn er fyrst með fréttirnar, en sjaldan að sagðar séu fréttir af úrslitum íþróttakappleikja sem ekki hafa farið fram. Það gerðist þó í síðustu viku þegar birtist kolröng frétt um úrslit í sveitakeppni Briddsfélags Borgarfjarðar. Blaðamaður gerðist sekur um að taka ekki eftir einu lykilorði sem birtist í fésbókartilkynningu briddsfélagsins og skildi hana þannig að síðasta kvöld keppninnar hefði verið spilað. Það var hins vegar næst-síðasta kvöldið. Beðist er velvirðingar á þessum hrapalegu mistökum. En nú hefur sá hinn sami blaðamaður staðfestar heimildir fyrir að mótinu er lokið. Það sem meira er að röð efstu sveita breyttist og verma Rollukarlar sér nú við ljúfsárar minningar, en úrklippt frétt úr blaðinu á fjórum ísskápshurðum er pínulítil huggun harmi gegn. En, gefum Ingimundi Jónssyni samfélagsmiðlastjóra BB orðið:

„Rollukallarnir, Jón, Baldur, Gísli og Ólafur, voru í toppsætinu fyrir kvöldið og voru búnir að ramma inn sigurmyndina úr Skessuhorninu. Þeir byrjuðu á að leika við Kempurnar; Sigurð, Stefán, Ingólf og Jóhannes. Kempurnar eru erfiðar viðureignar og fór svo að Rollukallarnir lutu í gras með litlum mun. Á meðan áttust við Guttarnir; Sindri, Egill, Heiðar og Logi, og Félag hárprúðra; Guðmundur, Ásgeir, Anna Heiða og Ingimundur. Guttarnir voru í miklum ham eftir stífar æfingar um liðna helgi og hlutu 12 stig.

Þá var staðan sú að Guttarnir áttu þrjú stig á Rollukallana og innbyrðis viðureign í lokaumferðinni. Guttarnir sáu greinilega hvernig Liverpool fór með Watford um helgina, settu í fluggírinn og völtuðu yfir Rollukallana. Impatalning sýndi fram á algera yfirburði, 20-0! Bikarinn var því Guttanna en Rollukallarnir verða að halda upp á Skessuhornið frá 13. mars hvar þeir eru Kóngarnir.

Á meðan á þessari slátrun stóð skutust Skólastjórarnir í annað sætið með góðum sigri á Kempunum. Rollukallarnir urðu því að láta sér þriðja sætið að góðu verða.

En þá að aðalatriðinu, nefnilega Butlernum. Þar sem sjö sveitir tóku þátt var yfirseta í mótinu en hún spilaði sömu spil innbyrðis og var því með í Butlerhlutanum. Sérstök aukaverðlaun voru þar í boði. Þar báru Logi og Heiðar höfuð og herðar yfir aðra og enduðu með rúmlega +1,2 og fengu því Butlerkóngabjórkrúsirnar.

Næsta mánudag verður einmenningskeppni félagsins og eru að sjálfsögðu allir velkomnir. Spilamennska hefst klukkan 20:00 á efri hæð í Logalandi.“

Líkar þetta

Fleiri fréttir