Alvarlegur misbrestur í framkvæmd samræmds prófs í íslensku

Nemendur í 9. bekk grunnskóla á landinu þreyja þessa dagana samræmd próf í íslensku, stærðfræði og ensku. Á prófi í íslensku í gær urðu tæknileg vandamál við prófið þess valdandi að einungis lítill hluti nemenda gat lokið þeim á tilsettum tíma. Skessuhorni hefur heimildir fyrir því að þessi handvömm við framkvæmd prófsins hafi lagst afar illa í nemendur sem margir hverjir tóku nærri sér að framkvæmd prófanna gekk ekki betur en raun ber vitni. Samkvæmt upplýsingum frá Menntamálastofnun gengur framkvæmd samræmds könnunarprófs í stærðfræði, sem nú stendur yfir, samkvæmt áætlun. „Það er von ráðuneytisins að nemendur geti lokið því prófi og enskuprófinu sem fram fer á morgun farsællega,“ segir í yfirlýsingu sem upplýsingafulltrúi menntamálaráðuneytisins var að senda.

„Mennta- og menningarmálaráðuneyti harmar að framkvæmd samræmdra prófa í íslensku í 9. bekk hafi mistekist með tilheyrandi óþægindum fyrir nemendur og kennara,“ segir í yfirlýsingu frá ráðuneytinu. „Mennta- og menningarmálaráðherra átti fund með Arnóri Guðmundssyni, forstjóra Menntamálastofnunar síðdegis í gær, þar sem farið var yfir umfang og ástæður vandans. Forstjóri Menntamálastofnunar upplýsti að tæknileg mistök hjá þjónustuaðila prófakerfisins urðu til þess að prófið var ekki fært yfir á afkastameiri netþjón. Hann greindi einnig frá því að þegar vandamálið kom í ljós setti Menntamálastofnun í gang viðbragðsáætlun og var áhersla lögð á að upplýsa alla um stöðuna.“

Mennta- og menningarmálaráðherra hefur boðað til fundar með öllum helstu hagsmunaaðilum miðvikudaginn 14. mars n.k. til að ákveða hvernig unnið verði úr stöðu mála í tengslum við samræmt könnunarpróf í íslensku. „Hagsmunir nemenda verða hafðir að leiðarljósi í því mati,“ segir í tilkynningunni.

Líkar þetta

Fleiri fréttir