Nú er verið að landa fyrsta loðnufarminum á Akranesi á þessari vertíð. Það var Venus NS sem kom með um þúsund tonn að landi í gærkvöldi og stendur dæling úr skipinu yfir. Gunnar Hermannsson, verkstjóri á Akranesi, sem stýrt hefur hrognaskurði og -frystingu fyrir HB Granda mörg undanfarin ár, segir á vef fyrirtækisins að vegna smæðar kvótans sé stefnan sú að öll loðnuhrogn verði fryst á Akranesi að þessu sinni. Akranes liggi vel við miðunum þaðan sem er einungis nokkurra klukkutíma sigling.

Venus NS fékk loðnuna í þessum fyrsta farmi suður af Reykjanesi, en Víkingur AK er nú staddur vestan við Reykjanes í loðnuleit og veiðum. Allt er klárt fyrir hrognaskurð og frystingu á loðnuhrognum á Akranesi en þar munu um hundrað manns vinna á vegum fyrirtækisins í þá daga sem loðnuhrognafrystingin stendur yfir. Kvótinn er þó afar lítill, eða um tíu þúsund tonn. Mælingar japanskra hrognakaupenda standa nú yfir á hrognafyllingu í þessum fyrsta farmi en samkvæmt upplýsingum sem Skessuhorn fékk á kajanum nú rétt fyrir hádegi er hátt hlutfall karlloðnu í þessum fyrsta afla, en karlinn fer í bræðslu sem og kvenloðnan þegar búið er að ná hrognunum.

,,Það er klárt að eitthvað af loðnu er búið að ganga fyrir Reykjanes og inn í Faxaflóa en vandinn er að finna hana. Það er ekki auðvelt þegar skipin eru fá og dreifð,“ segir Albert Sveinsson skipstjóri á Víkingi í samtali við HB Granda vefinn í gær.

Loðnuvinnsla hafin á Akranesi