Dalamenn lýsa yfir vonbrigðum með uppsagnir tveggja af þremur starfsmönnum í útibúi Sýslumannsins á Vesturlandi í Búðardal. Greint var frá málinu í 8. tölublaði Skessuhorns. Þar greindi sýslumaður frá því að útibúið í Búðardal yrði ekki opið alla virka daga eins og verið hefur, en að þjónustan yrði að öðru leyti óbreytt.

Sveitarstjórn Dalabyggðar fjallaði um málið á síðasta fundi sínum 20. febrúar. Í bókun sinni rifjar sveitarstjórn upp lög um framkvæmdavald og stjórnsýslu ríkisins í héraði sem tóku gildi í ársbyrjun 2015. Kváðu þau meðal annars á um ný umdæmi sýslumanna, sem fækkaði við breytinganna úr 21 í 9. Við það varð embætti Sýslumannsins á Vesturlandi til úr eldri sýslumannsembættum landshlutans. „Í skjölum ráðuneytisins frá þessum tíma kemur m.a. fram að leitast væri við að sem minnst röskun verði á skipulagi og starfsemi nýrra sýslumannsembætta og að tryggð verði áframhaldandi öflug þjónusta m.a. með því að tryggja að starfsemi verði áfram það sem hún var fyrir við setningu laganna. Sett var reglugerð nr. 1151/2014 þar sem m.a. kemur fram að útibú skuli vera í Búðardal,“ segir í bókun sveitarstjórnar.

“Ríkið gengur á bak orða sinna”

Í umsögn sem byggðarráð Dalabyggðar veitti um drög að reglugerðinni á sínum tíma var; „þess krafist að starfsstöðin í Búðardal verði sýsluskrifstofa eins og áður enda hefur ítrekað verið lofað að ekki verði um skerðingu á þjónustu að ræða við breytingarnar,“ eins og þar segir og vísað er til í bókun sveitarstjórnar nú. „Sveitarstjórn Dalabyggðar hefur vissan skilning á því að auka þurfi rekstrarafgang ríkissjóðs en mótmælir því að til þess þurfi ríkisvaldið að ganga á bak orða sinna á svo augljósan hátt og ná inn hagræðingu með því að skera svo gróflega niður opinber störf í sveitarfélaginu. Í aðgerðaráætlun sveitarstjórnar vegna íbúaþróunar sem samþykkt var í september 2017 og kynnt hefur verið alþingismönnum og ráðuneytum er m.a. lögð áhersla á nauðsyn þess að efla opinberar stofnanir í Dalabyggð með fjölgun starfa um 2-3. Góð aðstaða og húsnæði er fyrir hendi til að færa verkefni t.d. til skrifstofu sýslumannsembættisins í Búðardal,“ segir í bókuninni. „Það eru því sár vonbrigði að upplifa þennan niðurskurð hjá útibúi Sýslumannsins í Búðardal skömmu eftir sameiningu embættanna sem kynnt var sem aðgerð til styrkingar en hefur þveröfug áhrif í Dalabyggð.“

Dalamenn mótmæla fækkun starfsmanna sýslumanns í Búðardal