Í gær voru 76 nemendur útskrifaðir frá Háskólanum á Bifröst við hátíðlega athöfn. Útskriftarhópurinn samanstóð af nemendum úr viðskiptadeild, félagsvísinda- og lagadeild, námi í verslunarstjórnun og úr Háskólagátt.

Í hátíðarræðu Vilhjálms Egilssonar rektors vék hann að gildum skólans sem eru frumkvæði, samvinna og ábyrgð. „Af þessum gildum leiðir að áhersla er í náminu á hvatningu til heilbrigðs metnaðar og að rækta frumkvæði nemenda. Einnig að efla samvinnugetu einstaklingsins og hæfni til að vinna með mismunandi fólki, þar sem styrkleikar hvers annars eru nýttir. Í námi við Háskólann á Bifröst er markvisst stuðlað að því að kenna nemendum ábyrgð gegnum verkefnavinnu en hún er þannig uppbyggð að nemendur þurfa að deila og bera ábyrgð, gagnvart sjálfum sér og öðrum,“ sagði Vilhjálmur.

Verðlaun og útskriftarræður

Útskriftarverðlaun í grunnnámi hlutu Sandra Ýr Pálsdóttir í viðskiptadeild og Ásta Sóllilja Karlsdóttir úr félagsvísinda- og lagadeild. Í meistaranámi hlutu útskriftarverðlaun þau Kári Steinar Lúthersson úr viðskiptadeild og Erla María Árnadóttir úr félagsvísinda- og lagadeild. Að auki fengu tveir nemendur felld niður skólagjöld á haustönn vegna framúrskarandi námsárangurs. Það voru þau Vera Dögg Höskuldsdóttir nemandi í viðskiptadeild og Pétur Steinn Pétursson sem stundar nám í félagsvísinda- og lagadeild. Ræðumaður fyrir hönd grunnnema viðskiptadeildar var Unnur Steinsson og fyrir hönd grunnnema félagsvísinda- og lagadeildar var Hallgrímur Tómasson. Ræðumaður fyrir hönd meistaranema var Lee Ann Maginnis. Þóra Sif Svansdóttir flutti söngatriði við útskriftina við undirleik Daða Georgssonar. Að athöfn lokinni þáðu gestir léttar veitingar.

Háskólinn á Bifröst útskrifaði 76 nemendur