Stuttmyndin Donor er nýjasta verk kvikmyndagerðarmannsins Guðna Líndal Benediktssonar frá Staðarhúsum í Borgarfirði. Um er að ræða níundu myndina sem hann leikstýrir og skrifar í samstarfi við framleiðslufyrirtæki sitt, Fenrir Films. Það er rekið af hópi kvikmyndagerðarmanna sem hafa unnið að fjölda verkefna innan geirans undanfarin ár, meðal annars Game of Thrones og Star Wars: Rogue One. Guðni segir hugmyndina að Donor hafa látið á sér kræla fyrir um það bil einu ári.

„Ég var að grúska fyrir allt annað verkefni í ýmsum sögum af líffæraþjófnaði víða um heim, en þær eru fleiri og ógeðslegri en ég gat nokkurn tímann ímyndað mér. Ég horfi á gríðarlega mikið magn af kvikmyndum og þótti furðulegt að ég hafi ekki rekist á fleiri myndir um þetta málefni,“ segir hann. „Ég hafði alltaf séð fyrir mér menn vakna í baðkari fullu af ís eftir að hafa verið svæfðir á djamminu og rændir öðru nýranu og þar væri látið sitja. En þetta er talsvert flóknara og skipulagðara og algengustu fórnarlömbin eru ekki Vesturlandabúar úti á lífinu í fjarlægu landi. Þvert á móti eru það mestmegnis ungir krakkar af götunni sem engin mun sakna eða fáfróðir, bláfátækir smábændur sem vita ekki betur en að líffærin vaxi hreinlega aftur eftir að þau eru tekin,“ segir Guðni og bætir því við að sagan hafi nánast sprottið fullbúin upp í huga hans eftir að hann aflaði sér heimilda. „Þetta er saga af ungri konu sem vaknar aðeins of snemma eftir slíka aðgerð, áttar sig á því sem hefur gerst og reynir að leggja á flótta frá ókunnum spítala. Myndin er aðeins sjö mínútna löng og inniheldur ekkert tal, því við vildum að hún gæti ferðast sem víðast án þess að eiga á hættu á að tapa meiningunni í þýðingu,“ segir Guðni.

Ætla að senda myndina á hátíðir

Myndin var tekin upp í Edinborg í Skotlandi í júlí í fyrra og fór öll eftirvinnsla fram í London. Gerð myndarinnar er fjármögnuð af kvikmyndagerðamönnunum sjálfum. „Við vildum ekki biðja neinn fjárfesti um að styrkja okkur áður en við værum handvissir að við hefðum gæðavöru í höndunum,“ segir Guðni. „Nú er svo komið að myndin er tilbúin og nú þegar búin að hljóta önnur verðlaun í baráttunni um bestu stuttmyndina á Frostbiter – Icelandic Horror Film Festival á Akranesi og við ætlum að senda hana á hátíðir um víða veröld,“ bætir hann við.

Stærstu kvikmyndahátíðir í heimi rukka hins vegar fyrir innsendar myndir og því hafa Guðni og félagar brugðið á það ráð að efla til hópfjármögnunar til að brúa bilið. „Hún fer ljómandi vel af stað, við erum þegar komnir yfir 30% en betur má ef duga skal. Margt smátt gerir eitt stórt og ef einhver þarna úti situr á nokkrum ráðvilltum aurum þá getum við fundið not fyrir þá,“ segir Guðni Líndal Benediktsson kvikmyndagerðarmaður að endingu.

Þeim sem vilja leggja verkefninu lið er bent á að hópfjármögnunina hér.

Nú þegar 12 dagar eru eftir að söfnuninni á Karolina fund hafa 30% safnast af 2700 dollurum sem stefnt er að.

Stuttmyndin Donor fjallar um skipulagðan líffæraþjófnað