Heil umferð var leikin í 1. deild karla í körfuknattleik í gærkvöldi. Skallagrímur vann góðan sigur á Fsu, Snæfell varð að játa sig sigrað gegn Vestra í háspennuleik og ÍA tapaði stórt á móti Fjölni.

Borgnesingar stjórnuðu ferðinni

Skallagrímur sigraði FSu í Borgarnesi, 95-88. Heimamenn höfðu yfirhöndina allan leikinn en gestirnir leyfðu þeim ekki að stinga af. Skallagrímur leiddi með fimm stigum, 27-22, eftir fyrsta leikhluta en hafði ellefu stiga forskot í hléinu, 48-37.

Gestirnir spyrntu við fótum í upphafi síðari hálfleiks en þá settu Skallagrímsmenn í fluggírinn. Þeir leiddu með 20 stigum um miðjan þriðja leikhluta, 68-48, en gestirnir náðu að minnka muninn í 13 stig fyrir lokafjórðunginn, 76-63. Skallagrímur hóf fjórða leikhluta af krafti, náði 18 stiga forskoti og það var ekki fyrr en eftir miðjan leikhlutann að gestirnir náðu að svara fyrir sig. Þeir komust hins vegar aldrei nær en sem nam þeim sjö stigum sem munaði á liðunum þegar lokaflautan gall. Skallagrímur sigraði, 95-88.

Kristófer Gíslason átti stórleik fyrir Skallagrím, skoraði 31 stig og tók sjö fráköst. Eyjólfur Ásberg Halldórsson setti upp enn eina þrennuna. Hann skoraði ellefu stig, tók 14 fráköst og gaf tíu stoðsendingar. Aaron Parks skoraði 25 stig, tók fimm fráköst og gaf sex stoðsendignar og Darrell Flake var með tíu stig og níu fráköst.

Háspenna hjá Hólmurum

Snæfell heimsótti Vestra á Ísafjörð og máttu Hólmarar sætta sig við tap, 76-75, eftir æsispennandi lokamínútur. Snæfell byrjaði vel og hafði sjö stiga forystu eftir fyrsta leikhluta, 18-25 en gestirnir jöfnuðu metin snemma í öðrum fjórðungi. Eftir það var mikið jafnræði með liðunum og við hæfi að staðan væri jöfn í hálfleik, 47-47. Heimamenn höfðu heldur yfirhöndina eftir hléið og með góðri rispu náðu þeir sjö stiga forskoti fyrir lokafjórðunginn, 61-54. Vestri komst ellefu stigum yfir snemma í fjórða en eftir það minnkuðu Snæfellingar muninn hægt og sígandi. Hleyptu þeir mikilli spennu í leikinn á lokamínútunum. Þegar rúm mínúta lifði leiks voru þeir einu stigi frá heimamönnum. Vestri skoraði næstu stig en Snæfellingar stálu boltanum þegar 20 sekúndur lifðu leiks og fengu færi til að jafna. Þeir misstu boltann hins vegar frá sér og eftir sitt hvorar ferðir liðanna á vítalínuna höfðu Vestramenn að lokum sigur, 76-75.

Christian Covile skoraði 27 stig fyrir Snæfell, tók ellefu fráköst og gaf sex stoðsendingar. Nökkvi Már Nökkvason skoraði 15 stig og Rúnar Þór Ragnarsson ellefu.

Skagamenn töpuðu stórt

ÍA er enn án sigurs í deildinni í vetur eftir stórt tap gegn Fjölni á útivelli, 107-51. Skagamenn fundu aldrei taktinn og snemma leiks tók Fjölnir öll völd á vellinum. Heimamenn höfðu 13 stiga forskot eftir fyrsta leikhluta, 23-10 og leiddu með 31 einu stigi í hléinu, 51-20. Þriðji leikhluti var besti leikhluti Skagamanna í leiknum. Þeir skoruðu 18 stig en það dugði skammt gegn 31 stigi heimamanna. Staðan fyrir lokaleikhlutann var 82-38 og úrslit leiksins löngu ráðin. Fjölnir bætti lítið eitt við forystuna í lokafjórðungnum og sigruðu stórt, 107-51.

Sigurður Rúnar Sigurðsson var stigahæstur Skagamanna með 15 stig og Jón Orri Kristjánsson skoraði 14 stig og tók sjö fráköst.

Toppur, miðja og botn

Staða Vesturlandsliðanna í deildinni er þannig að Skallagrímur trónir á toppnum með 28 stig og fjögurra stiga forskot á Breiðablik í sætinu fyrir neðan. Snæfell er í fimmta sæti með 18 stig, tveimur stigum meira en Fjölnir og í harðri baráttu við liðið um síðasta sætið í úrslitakeppninni í vor. Skagamenn eru eftir sem áður á botni deildarinnar, án stiga eftir 17 leiki.

Skallagrímur leikur næst fimmtudaginn 1. febrúar þegar liðið mætir Fjölni í Borgarnesi. Á föstudag, 2. febrúar, taka Skagamenn á móti Hamri og sunnudaginn 4. febrúar mætir Snæfell liði FSu í Stykkishólmi.

: Snæfell tapaði naumlega gegn Vestra á Ísafirði. Ljósm. Vestri.is.

: Jón Orri Kristjánsson ver skot í leiknum gegn Fjölni, leik sem Skagamenn töpuðu stórt. Ljósm. Fjölnir.

Misjafn mánudagur hjá Vesturlandsliðunum