Snæfell mætti Breiðabliki í 1. deild karla í körfuknattleik á föstudagskvöld. Leikið var í Kópavogi. Heimamenn höfðu undirtökin frá því seint í fyrsta leikhluta og unnu að lokum öruggan sigur, 113-80.

Mikið jafnræði var með liðunum á upphafsmínútum leiksins og aðeins munaði einu stigi á liðunum um miðjan fyrsta leikhluta í stöðunni 16-15. Þá náðu Blikar góðum leikkafla og og höfðu níu stiga forskot eftir upphafsfjórðunginn, 31-22. Þeir héldu uppteknum hætti í öðrum fjórðungi og Snæfellsliðið náði ekki að halda í við þá. Heimamenn leiddu með 27 stigum í hléinu, 68-41 og á brattann að sækja fyrir Snæfell í síðari hálfleik.

Snæfell náði aðeins að minnka muninn í upphafi þriðja leikhluta en eftir það voru Blikar sterkari og juku forskot sitt að nýju. Þeir leiddu með 30 stigum fyrir lokafjórðunginn 91-61 og aðeins formsatriði að klára leikinn. Snæfell náði ekki að laga stöðuna í fjórða leikhluta og varð að lokum að sætta sig við stórt tap, 113-80.

Christian Covile var atkvæðamestur leikmanna Snæfells með 21 stig og ellefu fráköst. Viktor Marinó Alexandersson skoraði 20 stig, Aron Ingi Hinriksson 13 og Nökkvi Már Nökkvason tíu stig.

Erlendur Ágúst Stefánsson skoraði 28 stig í liði Breiðabliks, Jeremy Herbert Smith var með 24 stig, fimm fráköst og sex stoðsendingar, Christopher Woods 14 stig, sex fráköst og fimm stoðsendingar og Árni Elmar Hrafnsson ellefu stig og fimm stoðsendingar.

Snæfell situr í fimmta sæti deildarinnar með 18 stig eftir 16 leiki. Þeir eru fjórum stigum á undan Fjölni í sætinu fyrir neðan en sex stigum á eftir næstu liðum fyrir ofan. Næst leikur Snæfell í kvöld, mánudaginn 29. janúar þegar liðið mætir Vestra á Ísafirði.

Snæfell tapaði stórt gegn Breiðabliki