Skallagrímur mátti sætta sig við tap gegn Vestra, 95-89, eftir æsispennandi lokamínútur þegar liðin mættust á Ísafirði í gær.

Skallagrímsmenn höfðu heldur yfirhöndina í fyrsta leikhluta en heimamenn voru aldrei langt undan. Borgnesingar náðu mest sex stiga forskoti um miðjan leikhlutann en áður en hann var úti náðu heimamenn að komast yfir. Vestri leiddi með 26 stigum gegn 25 eftir fyrstu tíu mínúturnar. Vestramenn höfðu síðan yfirhöndina í öðrum fjórðungi og bættu aðeins við forskot sitt. Skallagrímsmenn gættu þess þó að hleypa heimamönnum ekki of langt fram úr sér. Vestri leiddi með níu stigum í hálfleik, 59-50.

Heimamenn voru ákveðnari framan af síðari hálfleik og náðu mesta forskoti leiksins um miðjan þriðja leikhluta. Þá leiddu þeir með 13 stigum, 73-60. En þá náðu Skallagrímsmenn góðri rispu og minnkuðu muninn í átt stig fyrir lokafjórðunginn, sem átti eftir að verða æsispennandi. Skallagrímsliðið var mjög öflugt, minnkaði muninn í eitt stig, 80-79, snemma í fjórða en náðu ekki að taka forystuna. Vestramenn leiddu naumlega næstu mínútur. Í stöðunni 91-89 með rúma hálfa mínútu á klukkunni stálu Skallagrímsmenn boltanum og brunuðu upp í sókn. Þeir fengu hins vegar dæmda á sig sóknarvillu og í næstu sókn geigaði þriggja stiga skot. Vestramenn skoruðu úr hraðaupphlaupi með tíu sekúndur eftir á klukkunni og kláruðu síðan leikinn af vítalínunni. Lokatölur urðu 95-89, Vestra í vil.

Aaron Parks var atkvæðamestur í liði Skallagríms með 31 stig og sex stoðsendingar. Bjarni Guðmann Jónsson skoraði 20 stig og tók tíu fráköst og Darrell Flake var með 14 stig og sex fráköst.

Skallagrímur trónir enn á toppi deildarinnar með 26 stig eftir 16 leiki og hefur tveggja stiga forskot á Breiðablik í sætinu fyrir neðan. Næst leikur Skallagrímur í kvöld, mánudaginn 29. janúar þegar liðið mætir FSu í Borgarnesi.

Skallagrímur tapaði eftir spennandi lokamínútur