Hátt í fjörutíu iðnaðarmenn starfa nú við byggingu á nýju hóteli, verslunarrými og íbúðablokk við Borgarbraut 57-59 í Borgarnesi. Stefnt er á að hótelið verði tilbúið til móttöku fyrstu gesta í vor en að lokið verði við byggingu íbúðablokkarinnar síðari hluta þessa árs.

Jóhannes Freyr Stefánsson hjá Ánaborg ehf. fer með verkstjórn á byggingarstað en það er fyrirtækið Hús og lóðir ehf. sem fjárfestir í mannvirkjunum. Húsin eru reist úr forsteyptum einingum frá Smellinn. Jóhannes segir í samtali við Skessuhorn að framkvæmdir hafi gengið vel eftir að þær fóru í gang að nýju eftir hlé á síðasta ári sem varð vegna deilna um skipulag á miðbæjarreitnum. Byggingarnar samanstanda af 84 herbergja hóteli á fimm hæðum, fjögur hundruð fermetra tengibyggingu á jarðhæð sem hugsuð er fyrir verslun og/eða þjónustu auk 28 íbúða blokkar á sjö hæðum en þær verða boðnar til sölu fyrir eldri borgara. Alls er byggingamagnið 8500 fermetrar og því langstærsta einstaka byggingaframkvæmdin sem í gangi er í héraðinu.

Jóhannes Freyr fór með blaðamanni Skessuhorn um hótelbygginguna og tengibyggingu á jarðhæð. Eftir á að reisa tvær síðustu hæðir íbúðablokkarinnar. Ljóst er að engu er til sparað í byggingu húsanna en herbergi á hótelinu verða rúmgóð og með góðu útsýni. Á efstu hæð eru hótelíbúðir og frá svíta í suðvesturhorni byggingarinnar er stórbrotið útsýni yfir héraðið. Á jarðhæð hótelsins verður m.a. matsalur, móttaka, bar og fundaherbergi en í kjallara verður t.d. aðstaða fyrir sauna og heitir pottar. Í fjögur hundruð fermetra tengibyggingu milli húsanna er gert ráð fyrir að hægt verði að stúka svæðið niður í t.d. fjögur aðskilin hundrað fermetra verslunarrými. Í kjallara undir tengibyggingunni verða bílastæði fyrir íbúðablokkina. Aðspurður segir Jóhannes að mikið sé spurt út í íbúðir í fjölbýlishúsinu en sala á þeim hefjist þó ekki fyrr en líður nær verklokum.

Hótel tilbúið í vor en íbúðablokk næsta haust