Samgöngu- og sveitarstjórnarráðuneytið og Vegagerðin hafa ákveðið að auka vetrarþjónustu og hálkuvarnir á ákveðnum köflum á þjóðvegum landsins. Þetta kemur fram í tilkynningu á vef Vegagerðarinnar. Markmiðið er að bæta umferðaröryggi og er þarna verið að bregðast við kröfu atvinnulífsins en ekki síst ferðaþjónustunnar sem er að fá til sín gesti allt árið. Undanfarið hafa ráðherra og vegamálastjóri kannað með hvaða hætti og hvar þurfi helst að bæta þjónustuna. Á Vesturlandi verður þjónusta á vegum milli Borgarness og Vegamóta á Snæfellsnesi færð upp um þjónustuflokk, sem og leiðin milli Borgarness og Hvanneyrar. Einnig verður snjómokstursdögum fjölgað úr tveimur í fimm og sömuleiðis uppfært þjónustustig á leiðinni upp í Húsafell (á Hálsasveitarvegi). Þjónusta verður sömuleiðis aukin á Útnesvegi á Snæfellsnesi, en umferð um hann er meiri en um Fróðárheiði þar sem þjónustan hefur verið meiri hingað til.

Hundrað milljónir í aukna þjónustu

Sigurður Ingi Jóhannsson, samgönguráðherra, segir brýnt að bæta vetrarþjónustu á vegum víða um land vegna aukinnar umferðar. Bæði vegna atvinnusóknar milli byggðarlaga og aukinna umsvifa í ferðaþjónustufyrirtækja sem bjóði í auknum mæli upp á ferðir árið um kring. „Með þessu eykst öryggi á þjóðvegunum enda nauðsynlegt að koma til móts við aukinn umferðarþunga og tryggja öruggar samgöngur allt árið. Reglur um snjómokstur hafa ekki verið endurskoðaðar í nokkur misseri og þörfin var orðin brýn. Við tryggjum meira fé til þjónustunnar í þágu aukins öryggis en um leið vil ég minna á að við þurfum alltaf að aka eftir aðstæðum og huga að hinum íslenska vetri,“ segir Sigurður Ingi.

Samkvæmt áætlunum Vegagerðarinnar mun kostnaður vegna aukinnar vetrarþjónustu og hálkuvarna á landinu öllu nema um 100 milljónum króna. Verða breytingar á vetrarþjónustunni innleiddar eins fljótt og auðið er með þeim tækjakosti og búnaði sem þegar er til staðar hjá Vegagerðinni.

kgk/ Ljósm. úr safni.

Vetrarþjónusta aukin á þjóðvegum landsins