Nokkrar athugasemdir bárust vegna aðalskipulagsbreytinga í Reykhólahreppi

Frestur til að skila inn athugasemdum vegna vinnslutillögu að aðalskipulagsbreytingum Reykhólahrepps vegna Vestfjarðavegar rann út föstudaginn 5. janúar. Alls bárust hreppnum átta athugasemdir og sex umsagnir. Skipulags-, húsnæðis- og hafnarnefnd Reykhólahrepps tók þær til umfjöllunar á fundi sínum mánudaginn 8. janúar. Tvær veglínur eru til skoðunar hjá sveitarfélaginu; Þ-H leið sem liggur um Teigsskóg og D2 leið sem liggur í göngum undir Hjallaháls og með nýjum vegi um Ódrjúgsháls.

Í umsögn Landverndar er eindregið mælt með að farin verði leið D2. Telur Landvernd að leið ÞH sé í mikilli andstöðu við náttúruverndarlög sem og lög um vernd Breiðafjarðar. Auk þess bendir Landvernd á að norðurströnd Þorskafjarðar og fjörur í Djúpafirði séu svæði á náttúruminjaskrá. Landvernd telur að ekki sé um brýna nauðsyn að ræða varðandi röskun á leirum og vistkerfum við þverun fjarða eins og gert er ráð fyrir í ÞH leið. Þar sé aðeins um ódýrari lausn að ræða. Þá nefna samtökin einnig að atriði er snúa að verndargildi Teigsskógar, efnistökusvæði, verndargildi jarðminja og bætt raforkuöryggi mæli með leið D2.

Í athugasemd Skipulagsstofnunar er bent á að sveitarfélagið þurfi að leita umsagna bæði Hafrannsóknastofnunar og Náttúrufræðistofnunar verði leið ÞH fyrir valinu. Ástæðan er atriði sem komu fram í áliti Skipulagsstofnunar um umhverfismat Vestfjarðavegar. Þá þurfi niðurstöðukafli að fylgja skipulagstillögu og yfirlit um skilmála og aðgerðir sem grípa verður til svo hægt verði að draga úr neikvæðum áhrifum á umhverfið. Í svari skipulagsnefndar kemur fram að aflað hafi verið upplýsinga um botndýralíf, straummælingar og þá þætti er getið var um í áliti stofnunarinnar. Einnig hafi verið óskað eftir frekari gögnum og frekari rökstuðningi Vegagerðarinnar.

Vilja D2 með styttri göngum

Reynir Bergsveinsson og Sævar Reynisson frá Gufudal óska eftir því að Vegagerðin rökstyðji hönnun vegar yfir Ódrjúgsháls samkvæmt leið D2. Gerir hún ráð fyrir vegi mun austar og hærra en núverandi vegur liggur, en ekki nær núverandi vegi eða jafnvel enn utar og lægra, austanvert við Lómahnjúk. Í svari kemur fram að sveitarfélagið hafi óskað eftir rökstuðningi frá Vegagerðinni fyrir útfærslu á leið D2 með tilliti til ábendinga.

Leifur Z. Samúelsson í Djúpadal slær svipaðan tón í athugasemd sinni. Hann leggur áherslu á að leið D2 verði fyrir valinu, en legu hennar breytt og gerð styttri göng. Sömuleiðis vekur Leifur athygli á löngum afleggjara inn að Djúpadal samkvæmt leið ÞH, sérstaklega í tengslum við skólaakstur og snjómokstur.

Ómar Ragnarsson leggur sömuleiðis til gangnagerð í athugasemd sinni og bendir á að lítið sé til af gögnum um göng á leið D2. Leggur hann til hugmyndir að staðsetningu gangnamunna og um leið legu styttri ganga. Í svari nefndarinnar segir að tillagan verði borin undir Vegagerðina og kallað eftir viðbrögðum.

Gunnlaugur Pétursson og fólkið frá Gröf í Þorskafirði lögðu fram álit og rökstuðning fyrir vali á leið D2, meðal annars vega umferðar- og rekstraröryggis, styttingu ferðatíma, greiðra samgangna og umhverfisáhrifa. Í athugasemdinn er lagt til að Reykhólahreppur hafni leið ÞH, meðal annars vega umhverfisáhrifa. Nefndin svaraði því til að tekið yrði tillit til sjónarmiða og rökstuðnings fyrir leið D2 við ákvörðun um leiðarval.

Samgöngur batni sem fyrst

Einnig komu fram óskir um að fara með veginn um Teigsskóg. Frá Sæmundi Guðmundssyni og fjölskyldu annars vegar og Önnulísu Magnúsdóttur hins vegar. Jafnframt eru stjórnendur hreppsins hvattir til að hefja framkvæmdir sem allra fyrst svo ekki verði frekari tafir á vegabótum. Nefndin tekur undir þau sjónarmið að bæta verði samgöngur og leggur áherslu á að það gerist hið fyrsta.

Gunnbjörn Jóhannsson frá Kinnarstöðum telur að skoða eigi leið I sem valkost. Það yrði láglendisvegur sem skapa myndi hringtengingu í sveitarfélaginu og stytta skólaakstur. Í svari nefndarinnar kemur fram að sveitarfélagið hafi skoðað alla valkosti sem hafa verið metnir með tilliti til umhverfisáhrifa. Leið I hafi ýmsa kosti en niðurstaða fyrri vinnu hafi verið sú að leiðir ÞH og D2 væru megin valkostirnir.

Telur Teigsskógarleið stangast á við lög