Þorrablót Skagamanna verður haldið með pompi og prakt í Íþróttahúsinu við Vesturgötu laugardaginn 20. janúar. Að vanda er blótið í höndum Club 71 og er þetta níunda blótið sem hópurinn sér um að skipuleggja. „Við lofum frábærri skemmtun og dúndrandi stuði eins og alltaf og gerum ráð fyrir að húsið verði troðfullt líkt og síðustu sex ár,“ segir Hörður Svavarsson, talsmaður Club 71 í samtali við Skessuhorn.

Hljómsveitin Bland sér um allt spil, bæði á þorrablótinu sjálfu og ballinu síðar um kvöldið. Meistarakokkarnir á Galito sjá um matinn líkt og síðustu ár, veislustjórn verður í höndum Sólmundar Hólm og fiðlusveitin Slitnir strengir verður með atriði. Þá munu stórsöngvararnir Stefán Hilmarsson og Sigga Beinteins skemmta á ballinu. „Skemmtiatriðin verða í hæsta gæðaflokki og annállinn verður auðvitað á sínum stað og er hann að þessu sinni í höndum ´77 árgangsins,“ segir Hörður en vill ekki ljóstra upp meiru varðandi skemmtiatriðin. „Það er alltaf smá leynd yfir þeim, en ég get þó lofað rífandi stemningu sem enginn má missa af.“

Þeir sem vilja tryggja sér miða á blótið verða að hafa hraðar hendur því undanfarin ár hafa færri komist að en vildu. Miðasala verður í Íslandsbanka við Dalbraut fimmtudaginn 11. janúar og hefst hún á slaginu klukkan 9. „Ég mæli með að fólk mæti strax til að tryggja sér miða. Á síðasta ári seldist upp á einni og hálfri klukkustund,“ segir Hörður. „Í fyrra komum við 670 manns í sæti en við vonum að með smá tilfæringum verði hægt að bæta við fleiri sætum í ár,“ bætir hann við.

Líkt og á síðustu árum mun allur ágóði af blótinu renna til íþróttafélaga og Björgunarfélags Akraness. Félagsmenn taka að sér vinnu á blótinu og hjálpa til við undirbúning og fá fyrir styrk í hlutfalli við unnar vinnustundir. „Þetta er okkar leið til að láta gott af okkur leiða og stefnum við alltaf á að byggja blótið upp með þeim hætti að geta gefið sem mest til þessara félaga,“ segir Hörður. „Ég vil líka þakka öllum Skagamönnum sérstaklega vel fyrir að sjá til þess að þessi kvöld verða alltaf ógleymanleg.“

Þorrablót Skagamanna á næsta leiti