Eins og Skessuhorn greindi frá fyrir jól kom forseti Íslands, Guðni Th. Jóhannesson í opinbera heimsókn í Dalabyggð dagana 6. og 7. desember ásamt eiginkonu sinni, Elizu Reid, og föruneyti. Í kjölfar heimsóknarinnar sendi fréttaritari Skessuhorns forsetahjónunum fáeinar spurningar sem þau gáfu sér tíma til að svara. Aðspurð hvort þau hjónin hafi verið kunnug Dölunum áður en að heimsókninni kom segja þau bæði svo vera. „Ég vissi af sögulega arfinum öllum saman, Laxdælu og atburðum í öðrum Íslendingasögum sem gerast þar, Sturlungum, Árna Magnússyni og þar fram eftir götunum,“ segir Guðni. „Við vorum einu sinni á leið á Erpsstaði að fá ís með alla krakkana en vorum sein fyrir í bíltúrnum og náðum því ekki í það skiptið,“ bætir Eliza við. Þau segja ekkert hafa komið sér á óvart í heimsókninni. „Alls staðar var tekið vel á móti okkur og landið var fagurt hvar sem við fórum,“ segir Eliza.

Þótti ferðin heppnast vel

„Okkur þótti ferðin öll heppnast vel en mér er kannski helst minnisstætt hvað börn og unglingar tóku mikinn þátt í fjölskylduhátíðinni í Dalabúð. Þau stóðu sig öll svo vel og gáfu öllu svo skemmtilegan blæ,“ segir Eliza aðspurð hvað hafi staðið upp úr í heimsókninni. Þau telja heimsóknina hafa gefið þeim góða mynd af samfélaginu í Dölum, „að því marki sem hægt er á tveimur dögum,“ segir Guðni. „Við heimsóttum sögufræga staði og sáum sóknarfæri í menningar- og sögutengdri ferðaþjónustu. Arnar Freyr og Fjóla, ungir bændur í Kringlu í Miðdölum, tóku á móti okkur með börnum sínum. Þar og víðar gátum við rætt um vanda sauðfjárbænda og leiðir til lausna. Okkur fannst Dalamenn horfa björtum augum fram á veg en vera um leið raunsæir,“ bætir Guðni við.

Létu kuldann ekki á sig fá

Mörgum finnst langt að fara vestur í Dali úr höfuðborginni en Dalamönnum þykir flestum stutt að keyra til höfuðborgarinnar. Forsetahjónin voru spurð hvað þeim þætti um þessar ólíku fullyrðingar og hvor þeirra ætti betur við að þeirra mati. „Ég held að fyrir ferðaþjónustuna sé mjög mikilvægt að benda á þau augljósu sannindi að það tekur um eða innan við tvo tíma að fara af höfuðborgarsvæðinu í Dalina. Það er vel hægt að skipuleggja góða dagsferð þangað fyrir útlendu ferðamennina, eða sunnudagsbíltúr fyrir okkur heimafólkið,“ svara Guðni. Var þetta fyrsta opinbera heimsókn forseta í desembermánuði og vetur konungur tók vel á móti gestunum. Aðspurð hvort skammdegi og kuldi hafi eitthvað haft að segja um upplifun og gæði heimsóknarinnar svarar Eliza því til að hún sé vön meira frosti í Kanada svo þetta var ekkert mál frá henni séð, „bara gaman,“ segir hún. „Seinni daginn var heiðskírt og það var einstaklega fallegt að sjá sólina skríða yfir fjöllin, og kuldinn var ekkert til að gera veður út af,“ segir Guðni.

Að endingu spurðum við þau hvort þau hefðu einhver sérstök skilaboð sem þau vildu koma á framfæri eftir heimsóknin. „Fyrst og fremst þakkir fyrir mikla gestrisni og hlýhug. Við hlökkum til að koma aftur í Dalina, og þá vonandi með börnin líka,“ segja þau bæði.

Forsetahjónin ánægð með heimsóknina í Dalina