Hætt verður að innheimta veggjald í Hvalfjarðargöngum í lok sumars, að sögn Gísla Gíslasonar stjórnarformanns Spalar, sem á og rekur göngin. Gísli sagði í samtali við Ríkisútvarpið í dag að þetta væri í takti við það sem samið var um áður en framkvæmdir hófust fyrir rúmum tuttugu árum. Endanleg dagsetning á hvenær yfirtakan fer fram liggur þó ekki fyrir en líklegt að það verði síðla sumars eða í haust.

Hvalfjarðargöngin voru opnuð fyrir umferð 11. júlí 1998. Frá upphafi var stefnt að því að ríkið tæki göngin yfir þegar gjaldtöku lyki og ekkert sem bendir til annars en að svo verði. Frá opnun hafa vegfarendur um Hvalfjarðargöng greitt veggjald sem í dag er þúsund krónur fyrir staka ferð á fólksbíl en um 280 krónur fyrir þá sem hafa fasta samninga og veglykla í bílum sínum. Áætlanir gera ráð fyrir að umferð um Kjalarnes og Hvalfjarðargöng aukist um 10% þegar gjaldtöku verður hætt.

Þó gjaldtöku verði hætt þarf engu að síður að sinna ýmiskonar þjónustu við veggöngin sem lúta að öryggismálum og viðhaldi. Þannig liggur til dæmis fyrir að fara verður innan tíðar í verulega kostnaðarsamar aðgerðir við endurnýjun dúks sem klæðir göngin að innan. Ríkið yfirtekur þá þjónustu þegar starfsemi Spalar verður hætt. Forsvarsmenn Spalar hafa hinsvegar marglýst yfir áhuga á að koma að tvöföldun Hvalfjarðarganga, það er nýjum göngum, í ljósi þess að umferð hefur þróast með þeim hætti að nú er hún komin að almennum öryggismörkum um umferð í evrópskum jarðgöngum. Á það hefur hins vegar verið bent að ástand Vesturlandsvegar, allt frá Mosfellsbæ og í Borgarnes er þó með þeim hætti að vegurinn sjálfur er ekki síður kominn að þolmörkum en Hvalfjarðargöngin. Í fjárlögum fyrir nýhafið ár er ekki gert ráð fyrir framkvæmdum við Vesturlandsveg eða tvöföldun Hvalfjarðarganga. Nýr ráðherra samgöngumála, Sigurður Ingi Jóhannsson formaður Framsóknarflokksins, hefur hins vegar ýtt út af borðinu hugmyndum Jóns Gunnarssonar fráfarandi ráðherra um að hefja stórfellda vegagerð á suðvesturhorni landsins sem fjármögnuð yrði með veggjöldum.

Útlit fyrir að gjaldtöku verði hætt síðsumars