Forsvarsmenn Skagans 3X undirrituðu skömmu fyrir jól stærsta samning sinnar tegundar sem íslenskt tæknifyrirtæki hefur gert. Þar er færeyska útgerðarfélagið Varðin Pelagic sem kaupir vinnslubúnað fyrir nýja uppsjávarvinnslu í Suðurey í Færeyjum. Virði samningsins er um fimm milljarðar íslenskra króna. Nýja vinnslan mun hafa afkastagetu fyrir allt að 1.300 tonn af pakkaðri vöru á sólarhring. Samningurinn kveður einnig á um að hægt verður að stækka vinnslugetuna í allt að 1.700 tonn á sólarhring. Auk Skagans 3X koma fyrirtækin Frost og Rafeyri á Akureyri að verkefninu ásamt fleiri íslenskum fyrirtækjum.

Skaginn 3X hafði árið 2012 sett upp heildarvinnslu fyrir Varðin Pelagic og var sú vinnsla á sínum tíma stærsta og fullkomnasta uppsjávarvinnsla í heiminum. Húsið sem hýsti vinnsluna brann hins vegar í júní síðastliðnum og hefur Varðin Pelagic síðan farið út í mikinn og nákvæman samanburð á lausnum til að geta byggt upp að nýju. „Það var skylda okkar að skoða alla kosti sem í boði voru og einnig að hlusta á kröfur viðskiptavina okkar og aftur höfum við komist að þeirri niðurstöðu að lausnin frá Skaganum 3X sé sú framúrskarandi lausn sem best mætir okkar kröfum best,“ segir Bogi Jacobsen, forstjóri Varðin Pelagic.

Skilvirkni, afurðagæði og umhverfisvernd

„Þetta er stærsti samningur í sögu fyrirtækisins og að mér vitandi stærsti samningur sem íslenskt tæknifyrirtæki hefur gert,“ segir Ingólfur Árnason forstjóri Skagans 3X. „Það er mikil viðurkenning í því fólgin að Varðin hafi aftur valið okkur og er sönnun þess að okkar lausnir eru í senn áreiðanlegar og framsæknar,“ segir Ingólfur.

Skaginn 3X hefur undanfarið gert fjölda samninga um nýjar lausnir í uppsjávariðnaði og má þar m.a. nefna uppsetningu á nýrri verksmiðju fyrir Eskju á Eskifirði, samning við France Pélagique um nýja kynslóð sjálfvirkrar vinnslu fyrir skip auk samningsins við Varðin Pelagic. Allar þessar lausnir eru stór skref í framþróun á sjálfvirknivæðingu og bættum gæðum afurða. „Fjölbreyttir möguleikar í framleiðslu og pökkun eru mikilvægir til að fullnýta auðlindir hafsins og til að mæta auknum kröfum markaðarins. Nýja vinnslan verður byltingarkennd heildarlausn fyrir uppsjávariðnaðinn þar sem sérstök áhersla er lögð á umhverfisvernd, skilvirkni og afurðagæði,“ segir Ingólfur Árnason.

Ingólfur Árnason og börn hans við undirritun samningsins við forsvarsmenn Varðin Pelagic skömmu fyrir jól.

Stærsti samningur Skagans 3X frá upphafi