Í Grundarfirði búa hjónin Runólfur Guðmundsson og Edda Svava Kristjánsdóttir. Hann hefur stigið ölduna í hartnær hálfa öld en hún sá um börn og bú á meðan eiginmaðurinn stundaði sjóinn. Kíkt var í aðventuheimsókn til þeirra hjóna þar sem rætt var um lífið í öllum sínum fjölbreytileika; börnin, fyrirtækið og ekki síst lífið eftir sjómennskuna.

Aldrei farið að heiman
„Ég er fæddur og uppalinn hér í Grundarfirði og hef því í raun og veru aldrei farið almennilega að heiman,“ segir Runólfur þegar búið er að koma sér fyrir í stofunni á heimili þeirra hjóna í Grundarfirði. „Við erum sjö bræðurnir og ein systir. Karlinn hætti ekki fyrr en komin var stelpa í hópinn,“ segir Runólfur og hlær dátt. „Reyndar er í raun einn bróðir enn, hann Móses Geirmundsson sem hefur alist upp með okkur, ekki síst í fyrirtækinu. Pabbi vildi hafa það þannig og okkur var það ljúft að hlíta því. Við systkinin erum öll búandi og starfandi hér við fyrirtækið nema einn bróðir sem býr annars staðar. Það var mikið fjör, þá og nú, en það er bara eins og lífið er og á að vera.“ Fyrirtækið er Guðmundur Runólfsson hf. sem faðir Runólfs stofnaði á sínum tíma og hefur verið fjölskyldufyrirtæki alla tíð. Runólfur segir einnig að hann þurfi að heyra vatnsnið, helst í sjónum. „Ég fór einu sinni á sundnámskeið í Reykholt í Borgarfirði og var þar í hálfan mánuð. Fyrstu vikuna var brjálað veður og mér hefur aldrei leiðst eins mikið á ævinni og bara í þetta eina skipti. Seinni vikuna var hins vegar hægt að vera úti og við fórum m.a. í fótbolta á einhverri flöt sem við máttum sparka á. Þá heyrði ég niðinn í ánni, Reykjadalsá sem þarna rennur. Þá fattaði ég hvað olli leiðindunum. Ég heyrði engan vatnsnið.“
Eiginkona Runólfs er Edda Svava Kristjánsdóttir. Hún er uppalin í Stykkishólmi. “Svo þú sérð,“ bætir Runólfur við; „að ég þurfti ekki einu sinni að fara af Nesinu til að ná mér í konu, hér er því allt sem ég þarf.“ Edda bætir kankvís við að það hafi nú stundum verið teknar skemmtilegar umræður um það, hvor staðurinn væri betri, Stykkishólmur eða Grundarfjörður. En þar sem sitt hafi sýnst hverjum í því, hafi eiginleg niðurstaða aldrei fengist í málið.

Sjá nánar í Jólablaði Skessuhorns.

„Það er allt til alls á Nesinu“