Háskólinn á Bifröst býður nú í fyrsta skipti upp á diplómanám í viðskiptafræði og verslunarstjórnun í samstarfi við Háskólann í Reykjavík, Starfsmenntasjóð verslunar- og skrifstofufólks og Starfsmenntasjóð verslunarinnar. Um er að ræða starfstengt fagháskólanám fyrir verslunarstjóra og einstaklinga með víðtæka reynslu af verslunarstörfum.

Námið er 60 ECTS eininga diplómanám sem byggt er á hæfnigreiningu og tekur mið af starfi verslunarstjóra. Námið er kennt með vinnu og tekur tvö ár í dreifnámi. Þá er námið að hluta til byggt upp á námskeiðum sem þegar eru kennd til BS gráðu í viðskiptafræði við Háskólann á Bifröst og Háskólann í Reykjavík. Þó er einnig að hluta til um ný námskeið að ræða, sérstaklega þróuð með sérþarfir verslunarinnar í huga og með þátttöku lykilfyrirtækja í greininni. Nemendur útskrifast með diplómagráðu að námi loknu en hafa svo möguleika á því að halda áfram og klára BS gráðu við Háskólann á Bifröst eða Háskólann í Reykjavík í viðskiptafræði. Styrkur námsins felst í virku samstarfi við atvinnulífið og í samstarfi háskólanna tveggja um þróun þess og kennslu. Jón Snorri Snorrason lektor Háskólans á Bifröst hefur tekið þátt í verkefninu fyrir hönd háskólans.

„Sífellt eru gerðar auknar kröfur til stjórnenda í atvinnulífinu hvað menntun varðar og eru stjórnendur almennt nú flestir með háskólanám að baki. Nýtt fagháskólanám í verslunarstjórnun er ætlað að gefa starfandi verslunarstjórum færi á að styrkja sig í starfi með því að bæta við reynslu sína og öðlast menntun við hæfi,“ segir Jón Snorri um nýju diplómuna.

Almenn inntökuskilyrði eru stúdentspróf eða sambærilegt nám, en einnig verður litið til starfsreynslu og hæfni við inntöku nemenda. Reynsla af verslunarstjórnun eða víðtæk starfsreynsla á sviði verslunar er skilyrði. Almennur umsóknarfrestur í námið er 20. janúar 2018 en mögulegt er að taka grunnáfanga í viðskiptafræði, auk birgða-, vöru og rekstrarstjórnun á vormisseri 2018 til að flýta fyrir.

Nýtt diplómanám í viðskiptafræði og verslunarstjórnun