Í febrúar næstkomandi kemur út bókin „Víkingur, sögubrot af aflaskipi og skipverjum,“ sem rituð er af Haraldi Bjarnasyni blaðamanni. Í bókinni er sagt frá aðdraganda smíði togarans Víkings AK-100 en hann kom nýr til Akraness 21. október 1960 og skipinu er fylgt í gegnum árin. Skipið var í rúma hálfa öld gert út frá Akranesi og alltaf með sama nafni og númeri. Það fór í sína hinstu sjóferð 11. júlí 2014 til Grenå í Danmörku þar sem það var rifið. Þá eru mörg viðtöl við skipverja, sem á einhverjum tíma voru um borð í Víkingi en mislengi þó og ýmsar sögur eru sagðar tengdar skipinu.

Víkingur var mikið happaskip alla tíð. Skipið var smíðað til að sækja á fjarlæg mið og var því við smíði þess sett það markmið að ganghraðinn væri mikill. Þótt Víkingur væri smíðaður sem togskip var hann þó lengst af notaður til nótaveiða og þar komu yfirburðir þessa gæðaskips aftur í ljós enda var það oftast í hópi aflahæstu nótaskipa.

Í bókarlok er svo viðauki um stofnun og aðdraganda að smíði Síldar- og fiskimjölsverksmiðju Akraness, sem lét smíða skipið og gerði það út þangað til Síldar- og fiskimjölsverksmiðjan var sameinuð HB&Co sem gerði út skipið þar til Grandi keypti HB&Co og til varð HB Grandi, sem gerði út Víking síðustu árin.

Sem fyrr segir er bókin væntanleg á markað í febrúar en nú þegar er hægt að kaupa hana í forsölu og hefur sérstök síða verið sett upp á facebook undir nafninu „Áskriftarsöfnun bókar um aflaskipið Víking.“ Verð bókarinnar í forsölu er 5.000 krónur sem greiðast við afhendingu. Hægt er að kaupa bókina með því að senda skilaboð í gegnum þá síðu eða senda skilaboð til höfundar ásamt kennitölu, heimilisfangi og símanúmeri á netfangið hallibjarna@simnet.is

Víkingur, sögubrot af aflaskipi og skipverjum er um 160 blaðsíður að stærð í stóru broti og rækilega skreytt myndum frá mörgum áhuga- og atvinnuljósmyndurum auk mynda frá skipverjum. Að sögn höfundar er farið af stað með áskriftarsöfnun núna svo auðveldara sé að gera sér grein fyrir hve prenta þarf bókina í mörgum eintökum. Hann segist telja bókina eiga mikið erindi til Akurensinga, sjómanna um allt land og raunar allra sem áhuga hafa á sögu íslenskra skipa og sjávarútvegs.

Bók um aflaskipið Víking AK-100 væntanleg