Fyrirtækið Arctic Protein rekur litla fiskþurrkun sem nú er til húsa í iðnaðarhúsi við Sólbakka 4 í Borgarnesi. Fyrst eftir að verksmiðjan var tekin í notkun var hún við Vallarás. Í verksmiðjunni er einkum unnið próteinduft úr fiskslógi sem fellur til við slátrun á eldislaxi Arnarlax á Vestfjörðum. Fyrirtækið hefur tilskilin starfsleyfi til vinnslunnar en vegna þrálátrar lyktarmengunar og að ekki hefur veirð brugðist við umkvörtunum á það yfir höfði sér afturköllun starfsleyfis. Undanfarna mánuði hefur veruleg lyktarmengun lagt frá starfseminni.

Helgi Helgason framkvæmdastjóri HeV staðfestir að mengunarvörnum sé áfátt í verksmiðjunni og nú sé komið að því að krafist verði úrbóta ellegar að starfsemin verður stöðvuð. „Það var settur upp mengungarvarnarbúnaður en engu að síður er lofti úr húsinu dælt óhreinsuðu út um túðu á vegg. Samþykkt var á fundi í stjórn HeV 30. október síðastliðnum að gefa frest til 15. nóvember að gera nauðsynlegar úrbætur. Þær hafa ekki enn verið gerðar,“ staðfestir Helgi í samtali við Skessuhorn. Hann segir að á næsta fundi í stjórn Heilbrigðiseftirlits Vesturlands, 18. desember næstkomandi, verði lagt til að fyrirtækinu verði gert að framkvæma tafarlausar úrbætur til að koma í veg fyrir mengun en að öðrum kosti verði starfsleyfið afturkallað.

Verkfræðistofa vinnur að úrbótum með fyrirtækinu

Í færslu á Facebook síðu Borgarness útskýrir Víðir Örn, talsmaður fyrirtækisins, ástæður lyktarmengunar sem berst frá Arctic Protein: “Undanfarið höfum við verið að fá kvartanir vegna lyktar frá starfsemi okkar. Lyktinni mætti lýsa sem ósonblandaðri suðulykt sem hefur stundum fundist í kringum húsnæði okkar.

Við höfum nýlega bætt við ósónkerfi okkar sem á að hafa það hlutverk að eyða þeirri lykt sem gengur út um skorstein hússins. Sú breyting skilaði sér í því að gufan sem gengur út um skorsteininn hefur þessa einkennilegu ósónlykt sem sumum finnst vera ólykt. Undir skorsteininum er vifta sem blæs svo lofti úr vinnslusal okkar og hefur sú lykt, ef einhver, blandast við gufuna.

Það sem ég vildi koma á framfæri er að nú höfum við fengið til liðs við okkur ráðgjafa frá verkfræðistofu Eflu sem ætlar að koma með lausnir yfir það hvernig best sé að hreinsa það loft sem kemur frá verksmiðjunni, sem og hvernig sé best að stækka og breyta skorsteininum. Skorsteinninn sem nú er á húsnæðinu er þannig að gufan gengur bæði upp og niður úr svokölluðum hatti sem er efst á honum. Það gerir það að verkum að gufan leitar fljótt beint til jarðar.

Ég vona að þið getið gefið okkur tíma til að laga okkar mál svo við getum haldið áfram að starfa í þessu frábæra bæjarfélagi í sátt og samlyndi við ykkur íbúana,” skrifar Víðir Örn.

Hreinsibúnaði ábótavant við fiskþurrkun í Borgarnesi