Stjórn Háskólans á Bifröst hefur samþykkt nýja stefnu sem gildir fyrir árin 2018 til 2021. Byggir hún á niðurstöðum stefnumótunarfundar sem haldinn var í lok október. Á þann fund var boðað fulltrúaráð skólans, starfsfólk, nemendur og fulltrúar aðstandenda skólans. Góð mæting var á fundinn en hann sóttu yfir 50 manns og mörg áhugaverð sjónarmið voru viðruð. Stjórn Háskólans á Bifröst hélt síðan fund 27. nóvember síðastliðinn þar sem fjallað var um niðurstöður stefnumótunarvinnunnar og samþykkt ný stefnu fyrir skólann árin 2018 – 2021. „Sú stefna sem skólanum er markað með breytingunum skerpir á sérstöðu skólans sem alþjóðlegs viðskiptaháskóla og dregur fram þá þróun og nýjungar í kennsluháttum sem skólinn hefur tileinkað sér síðustu ár. Háskólinn á Bifröst hefur verið mjög framarlega í fjarnámi á Íslandi um hríð og nú þegar er til dæmis allt meistaranám kennt í fjarnámi. Kennsla fer fram á netinu og allir fyrirlestrar eru rafrænir sem gerir það að verkum að nemendur geta ráðið yfirferð námsefnisins. Því hentar námið einstaklega vel með vinnu og fellur vel að þörfum atvinnulífsins.“

Vænlegur staður til búsetu

Í stefnumótun fyrir skólann segir jafnframt: „Háskólinn á Bifröst er í fararbroddi í fjarnámi á Íslandi og mun ganga enn lengra í þeirri stefnumörkun. Áherslan verður á námslíkan með búsetu á Bifröst en í því felst í grófum dráttum að ekki verður um að ræða eiginlegt staðnám eða fjarnám heldur nám með eða án búsetu á Bifröst. Bifröst er draumastaðsetning skólans og því verður sérstaklega unnið að því að styrkja þéttbýliskjarnann á svæðinu sem vænlegan búsetukost fyrir námsmenn sem kjósa að búa í háskólaþorpi. Komið verður til móts við þarfir námsmanna með því að bjóða upp á ódýrt húsnæði í barnvænu umhverfi á Bifröst. Einnig verða skólagjöld í grunnnámi lækkuð umtalsvert.“

Eini eiginlegi viðskiptaháskólinn

„Háskólinn mun ganga enn lengra í því að sérhæfa sig á sviði viðskipta og markar sig sem eina eiginlega viðskiptaháskólann á Íslandi. Einnig verður farið ákveðið fram í alþjóðavæðingu og haldið áfram að styrkja tengls við atvinnulífið. Í ljósi ofangreindra áhersluþátta á að auka frekar námsframboð og verður námið aðgengilegt bæði á ensku og íslensku. Háskólinn á Bifröst hefur verið í samstarfi við yfir 70 erlenda háskóla en stuðlað verður að því að styrkja alþjóðlegt samstarf enn frekar og að fjölga erlendum nemendum við Háskólann á Bifröst.“

Skerpt á sérstöðu skólans sem alþjóðlegs viðskiptaháskóla