Margt var um manninn á Akratorgi síðdegis í gær þegar jólaljósin á Akratorgi voru tendruð við hátíðlega athöfn. Skólakór skipaður yngri nemendum Grundaskóla hóf athöfnina með flutningi á nokkrum jólasöngvum undir stjórn Valgerðar Jónsdóttur. Lokalag kórsins var nýtt jólalag, Torgið ljómar, sem var sérstaklega samið af Valgerði fyrir þetta tilefni.

Sigríður Indriðadóttir, forseti bæjarstjórnar, sagði frá uppruna trésins á torginu og aðstoðaði afmælisdrengina Birki Hrafn Theodórsson og Björn Leó Aronsson, sem báðir urðu sjö ára gamlir þennan dag, við að kveikja ljósin á jólatrénu. Jólatréð sem prýðir torgið í ár var gróðursett um 1980 í landi Stóru-Fellsaxlar norðan við Akrafjall. Eftir að ljósin á trénu voru kveikt, birtust nokkrir þrælvilltir jólasveinar sem virtust ekki alveg átta sig á því að þeirra tími væri ekki kominn. Þeir létu það ekki á sig fá og tóku nokkur lög með mannfjöldanum og laumuðu mandarínum í lófa barnanna áður en þeir hurfu aftur á braut.

Þeir Birkir Hrafn Theodórsson og Björn Leó Aronsson tendruðu ljósin á trénu en þeir áttu bátir sjö ára afmæli þennan dag. Ljósm. emg.

Tveir afmælisdrengir tendruðu ljósin á jólatré Skagamanna