Forseti Íslands, Guðni Th. Jóhannesson, mun fara í opinbera heimsókn í Dalabyggð ásamt föruneyti dagana 6. og 7. desember næstkomandi. Af því tilefni verður boðið til fjölskylduhátíðar í Dalabúð að kvöldi fimmtudagsins 7. desember.

Á meðan ferð forseta um Dali stendur mun hann heimsækja bæði fyrirtæki og áhugaverða staði í Dalabyggð. Á vefnum budardalur.is er greint frá því að forsetinn muni líta við í Auðarskóla í Búðardal, heimsækja Lauga í Sælingsdal sem og skoða fyrirhugaðan Sturlureit á Staðarhóli í Saurbæ. Einnig mun hann heimsækja hið forna höfuðbýli Skarð á Skarðsströnd og fara fyrir Klofning og um Fellsströnd.

Dagskrá forsetaheimsóknarinnar er sem hér segir, fengin af heimasíðu Dalabyggðar:

Miðvikudagurinn 6. desember

15:00 Hjúkrunarheimilið Fellsendi.

15:40 Heimavinnsla á Erpsstöðum.

16:10 Ostagerð MS í Búðardal.

16:40 Leifsbúð. Opinn fundur um framtíð í ferðaþjónustu. Kynnt verða áform um uppbyggingu í Ólafsdal, Vínlandssetur og söguhringinn um Fellsströnd og Skarðsströnd. Kaffiveitingar.

18:10 Byggðasafn Dalamanna á Laugum í Sælingsdal.

Fimmtudagurinn 7. desember

08:30 Forseti og föruneyti fer um Skarðsströnd og Fellsströnd með leiðsögn og stoppað stuttlega á fáeinum stöðum.

11:40 Heimsókn í Auðarskóla, leikskóladeild og grunnskóladeild. Forseta og föruneyti er boðið í mat í skólanum.

13:15 Eiríksstaðir.

14:00 Kvennabrekka. Skilti um Árna Magnússon fræðimann og handritasafnara afhjúpað af forseta Íslands.

14:40 Kringla. Heimsókn á sauðfjárbú.

15:30 Silfurtún.

17:00 Fjölskylduskemmtun í Dalabúð. Veitingar úr héraði og fjölbreytt skemmtiatriði.

„Sveitarstjórn Dalabyggðar mun fylgja hjónunum um héraðið. Heimamenn eru hvattir til að taka þátt á hverjum stað og þá sérstaklega að fjölmenna á opinn fund í Leifsbúð, heimsókn á Byggðasafn Dalamanna, afhjúpun skiltis við Kvennabrekku og fjölskylduskemmtun í Dalabúð,“ segir á heimasíðu Dalabyggðar.

Forseti Íslands sækir Dalina heim