Stígamót hófu reglubundna þjónustu á Vesturlandi í byrjun þessa árs með að bjóða upp á viðtöl fyrir brotaþola kynferðisofbeldis. Viðtölin voru hálfsmánaðarlega í Borgarnesi og á Akranesi. Erla Björg Kristjánsdóttir félagsráðgjafi hjá Stígamótum hefur séð um þjónustuna á Vesturlandi og segir hún það mikilvægt fyrir brotaþola að geta sótt stuðning í sínu nærumhverfi. „Okkar reynsla er að þessi þjónusta er mjög vel nýtt og ég er viss um að við séum að ná til mun fleiri brotaþola með því að bjóða upp á þjónstuna svona víða. Okkar vilji er að ná til sem flestra,“ segir Erla Björg. Stígamót eru grasrótarsamtök sem berjast gegn kynferðisofbeldi og veita aðstoð fyrir fólk af öllum kynjum sem hefur verið beitt kynferðisofbeldi. Með kynferðisofbeldi er átt við nauðganir, kynferðislega áreitni, klám, sifjaspell, starfrænt kynferðisofbeldi og vændi eða mansal.

Eðli þjónustunnar

„Við bjóðum fyrst og fremst upp á einstaklingsviðtöl fyrir brotaþola og eru allir sem hafa orðið fyrir kynferðisofbeldi og hafa náð 18 ára aldri velkomnir til okkar. Einnig geta aðstandendur kynferðisbrotaþola komið til okkar í viðtöl, enda geta brot af þessu tagi líka haft áhrif á aðstandendur,“ segir Erla Björg og bætir því við að þjónustan sé alveg að kostnaðarlausu og engin takmörk séu á fjölda viðtala. „Við leggjum áherslu á einstaklingsmiðaða nálgun og er misjafnt hversu mikla aðstoð hver og einn þarf, svo fjöldi viðtala tekur mið af því. Við byggjum okkar aðstoð á hugmyndafræði sem heitir hjálp til sjálfshjálpar og reynum við að skoða með brotaþolum hvaða afleiðingar brotið hefur haft á líf viðkomandi og vinnum út frá því,“ segir Erla Björg.

Fyrir þá sem ekki geta nýtt sér þjónustu Stígamóta, t.d. vegna búsetu, er einnig hægt að sækja sér aðstoð í gegnum síma eða internet. „Við reynum alltaf að teygja okkur í allar áttir og til allra sem þurfa á aðstoð okkar að halda. Við vitum vel að þó við séum að bjóða upp á viðtöl úti á landi eiga ekki allir heimangengt til okkar. Því er alltaf hægt að fá símaviðtal eða viðtal í gegn um internetið, t.d. í gegn um Skype,“ segir Erla Björg. Aðspurð hvert skuli leita til að fá viðtal segir Erla Björg að fyrir þá sem eru á Vesturlandi sé hægt að hafa samband við hana í tölvupósti erla@stigamot.is, auk þess sem hægt sé að hringja í síma 562-6868 eða hafa samband á Facebook síðu Stígamóta.

Stígamót með reglulega starfsemi á Vesturlandi