Alls urðu 16 umferðaróhöpp í umdæmi Lögreglunnar á Vesturlandi í liðinni viku og rekja má þau til hálku og slæms veðurs. Flest óhappanna voru slysalaus. Bíll lenti utanvegar við Fiskilæk í gærdag og valt en engin slys urðu á fólki. Var óhappið eitt þriggja umferðaróhappa í umdæminu í gær. Á mánudag urðu fjögur óhöpp í Borgarfirði þegar bílar fóru út af vegi og tveir þeirra ultu. Engin slys urðu á fólki.

Eins og greint er frá í Skessuhorni vikunnar valt hópferðabifreið á Snæfellsnesvegi með 14 farþega. Reyndust sjö þeirra vera slasaðir og voru þrír þeirra fluttir með þyrlu Landhelgisgæslunnar til Reykjavíkur. Á vettvangi var mikil hálka og hvasst í veðri og var veginum um Breiðuvík og Staðarsveit lokað um tíma vegna ótryggra akstursskilyrða.

Lögregla hvetur fólk til að fara varlega

„Færð er erfið og mikil hálka búin að vera á vegum í landshlutanum. Veðurspáin er þannig fram á laugardag að reikna má með erfiðri færð áfram. Því er ástæða til að hvetja fólk til að aka varlega,“ segir vakthafandi lögregluþjónn í samtali við Skessuhorn. Hann segir vegfarendur almennt fara að öllu með gát. Lögregluþjónar hafi orðið þess varir að umferðarhraði hafi verið lægri en venjulega og er það til vitnis um að flestir taki mið af aðstæðum og við aksturinn.

Ekkert hraðakstursbrot

Þrír ökumenn voru stöðvaðir af lögreglu grunaðir um akstur undir áhrifum ávana- og fíkniefna í vikunni. Tvö minniháttar fíkniefnamál komu upp í umdæminu og teljast þau upplýst. Brotist var inn í húsnæði í Munaðarnesi í liðinni viku. Lögregla hafði hendur í hári innbrotsmannsins sem viðurkenndi að hafa farið þar inn. Bifreið sem stolið hafði verið úr Reykjavík fannst í umdæminu og hefur verið komið til eiganda síns. Enginn ökumaður var stöðvaður fyrir of hraðan akstur í umdæmi Lögreglunnar á Vesturlandi í vikunni sem leið.

Sextán umferðaróhöpp vegna hálku og slæms veðurs