Sunnudaginn 19. nóvember næstkomandi klukkan 16:00 verða í Langholtskirkju í Reykjavík haldnir áhugaverðir tónleikar sem unnendur sönglistar ættu ekki að láta fram hjá sér fara. Þar munu ellefu kórar og einsöngvarar flytja fjölbreytta söngdagskrá. Allur ágóði af sölu aðgöngumiða á tónleikana rennur til styrktar Umhyggju, félags langveikra barna. Hvatamaður að tónleikunum og skipulagningu þeirra er Húnvetningurinn Eiríkur Grímsson sem sjálfur stendur á tímamótum í lífi sínu.

„Kannski má í og með segja að ég standi fyrir þessum tónleikum í tilefni þess að ég verð 70 ára daginn eftir, það ýtti mér allavega af stað í þetta. Þegar ég áttaði mig á að ég væri að nálgast 70 árin núna í haust fór ég að velta ýmsu fyrir mér. Ég komst nefnilega að raun um að hef átt yndislegt líf. Ekki áfallalaust, en gott líf. Ég hef verið heilsuhraustur, eignast heilbrigð börn og yndisleg barnabörn. Þá hef ég fengið að vinna við margt sem veitt hefur mér lífsfyllingu,“ segir Eiríkur í samtali við Skessuhorn. Sjálfur hefur hann lengst af sínum starfsaldri unnið hjá Námsgagnastofnun, en lét af störfum fyrir aldurs sakir í fyrrahaust.

Eiríkur segir að hann hafi notið þeirrar gæfu að geta nánast allt sitt líf verið í tengslum við tónlist og sérstaklega kórsöng. Hann byrjaði sjálfur að syngja í kór þegar hann var fimmtán ára og steig fyrstu skrefin með Karlakór Bólstaðarhlíðarhrepps, en Eiríkur er fæddur og uppalinn á Ljótshólum í Svínadal. Sá mæti kór vann einmitt keppnina Kórar Íslands sem lauk á Stöð 2 á sunnudagskvöldið. Frá fimmtán ára aldri hefur Eiríkur starfað með ýmsum kórum auk þess sem honum hefur verið trúað fyrir stjórnun kóra og söngsveita. Þá hefur hann samið lög og útsett fyrir kóra. „Ég semsagt á 55 ára söngafmæli um þessar mundir. Í kórstarfinu í gegnum tíðina hef ég eignast marga vini fyrir lífstíð og átt þar margar frábærar stundir. Söngferðir eru fjölmargar og eftirminnilegar og ýmislegt sem ég hef séð og upplifað hefði varla verið gert nema vegna kórastarfsins.“

Hann segist hafa áttað sig á því að allir eru ekki eins heppnir og hann. „Þess vegna datt mér í hug að gaman væri nú að launa fyrir sig og gera eitthvað fyrir þá sem kannski hafa ekki eignast yndislegt líf. Þess vegna datt mér í hug að efna til tónleika í Langholtskirkju sunnudaginn 19. nóvember og kalla þar til kóra, sönghópa og einsöngvara sem ég hef haft tengsl við í gegnum tíðina. Afraksturinn af tónleikunum mun óskertur renna til stuðnings Umhyggju. Um leið verður það framlag tónleikagesta að langveik börn geti eignast að einhverju leyti betra líf, vonandi yndislegt líf. Ég bind miklar vonir við að húsfyllir verði á tónleikana og hvet því Vestlendinga sem eiga heimangengt að fjölmenna í eina borgarferð.“

Á tónleikunum Yndislegt líf koma fram: Kammerkór Reykjavíku, Góðir grannar, Ópus 12, Húnakórinn, Söngfuglar, Karlakór Kjalnesinga, Þrjár klassískar, Margrét Einarsdóttir, Viðar Gunnarsson, Signý Sæmundsdóttir, Einar Claesen og Ólafur M Magnússon. Kynnir á tónleikunum verður Guðmundur Guðlaugsson frá Hvammi í Hvítársíðu. Aðgangseyrir er 2.500 krónur. Í lok tónleikanna munu allir viðstaddir bresta í söng og syngja saman Yndislegt líf eftir Weiss, texta við þýðingu Kristjáns Hreinssonar.

Þakkar fyrir yndislegt líf með samnefndum tónleikum