Næstkomandi laugardag, 7. október, verður Sauðamessa haldin hátíðleg í Borgarnesi. Er þetta fjórtánda árið í röð sem hátíðin fer fram og að vanda verður fjölbreytt dagskrá, bæði fastir liðir sem nýir. Fyrir árrisula sauði sem vilja byrja daginn á smá átökum verður Gunna Dan með sauðaspinning í íþróttamiðstöðinni klukkan 10. „Þetta stefnir allt í þrusugóða Sauðamessu í ár,“ segir Hlédís Sveinsdóttir skipuleggjandi Sauðamessu í samtali við Skessuhorn.

Markaður í Hjálmakletti

Í ár verður sú nýbreytni að skipta hátíðinni í tvennt. Markaðurinn verður að þessu sinni í Hjálmakletti frá klukkan 10 til 14 en þá færist dagskráin yfir í Skallagrímsgarð. „Í Hjálmakletti kennir ýmissa að grasa. Þar verðum við með markað þar sem ýmislegt verður í boði, svo sem ýmislegt skart, föt, handklæði, bækur, kindakökurnar hennar Sylvíu og íslenskt sinnep, svo eitthvað sé nefnt. Við hvetjum sérstaklega foreldra til að mæta með börnin en Anna Dröfn verður að búa til brjóstsykur á staðnum og Ísleifur heppni mun gera ís með fljótandi köfnunarefninu Nitrogen þar sem aðeins verða notuð ekta hráefni og engin íblöndunarefni. Það er mjög skemmtilegt sjónarspil,“ segir Hlédís. „Fjórði flokkur drengja í fótbolta hjá Skallagrími verða með vöfflur sem er partur af fjáröflun þeirra,“ bætir hún við.

Dagskrá í Skallagrímsgarði

Fjölbreytt dagskrá verður í Skallagrímsgarði á milli klukkan 14 og 16. „Við höfum ákveðið að hafa ekki fjárrekstur í gegn um bæinn þetta árið. Óskum við eftir fólki að rækta manneskjuvanar og gæfar kindur til að geta tekið þennan lið upp á ný. Ég vil ekki láta reka styggar og hræddar kindur í gegnum bæinn svo á meðan Sauðamessa hefur ekki aðgang að spökum kindum leggst þessi viðburður af, eins skemmtilegur og hann getur verið,“ segir Hlédís. „Það verður þó nóg um að vera og þrusugóð dagskrá í boði. Þau Hrönn Jónsdóttir og Sigursteinn Sigurðsson halda hátíðaræðu að þessu sinni. Lærakappátið verður á sínum stað en þeir Jón Karl og Ómar Bjarki munu sjá um það. Þá ætlar Tónlistarskóli Borgarfjarðar að sýna gestum atriði úr Mógli. Fimm rétta máltíð að nafni kjötsúpa verður í boði fyrir alla, endurgjaldslaust, eins og verið hefur undanfarin ár. Raftarnir hafa séð um súpuna í fjölmörg ár en nú ætlar 4. flokkur drengja í knattspyrnu að taka við þeim bolta. Viljum við þakka Röftunum innilega fyrir vel unnin störf í gegnum tíðina, við erum þeim afar þakklát,“ segir Hlédís. „Þá hlakka ég mikið til að sjá allar sauðaflíkurnar í garðinum yfir daginn og vona að allir séu um það bil að taka meistarastykki af prjónunum því Ístex mun veita verðlaun fyrir bæði fallegustu lopaflíkina og frumlegustu lopaflíkina,“ bætir hún við.

Sauðamessu lýkur með sauðamessuballi í Hjálmakletti kl. 23 þar sem Stuðlabandið mun leika fyrir dansi. „Svo allir fái eitthvað gott í magann eftir ball fá gestir lifrapylsusneið með sér heim í boði Kjarnafæðis. Við viljum viðhalda gleði og fegurð gesta okkar með járn- og próteinríkri fæðu svo allir vakni hressir á sunnudagsmorgni, tilbúnir í messu og lifrapylsan er kjörin til þess,“ segir Hlédís að lokum.

Sauðamessa verður á laugardaginn