2. október 2021
Á samgönguþingi sem fram fór í Hveragerði í vikunni voru kynntar niðurstöður starfshóps um framkvæmdir á stofnvegum út frá höfuðborgarsvæðinu með tilliti til að framkvæmdirnar verði fjármagnaðar með veggjöldum. Um er að ræða þann hluta Reykjanesbrautar sem ekki hefur þegar verið tvöfaldaður, Suðurlandsveg það sem eftir á að tvöfalda austur fyrir Selfoss og Vesturlandsveg að Borgarfjarðarbrú. Jón Gunnarsson samgönguráðherra skipaði starfshópinn og fól honum að skoða leiðir til sérstakrar fjármögnunar í því skyni að flýta framkvæmdum við helstu stofnvegi til og frá höfuðborgarsvæðinu. Í skýrslu starfshópsins hafa verkáfangar nú verið skilgreindir, sett er upp framkvæmdaáætlun svo og tillögur um fjármögnun, rekstrarfyrirkomulag og gjaldheimtu. Settar eru fram tölur um kostnað við umferðarslys á þessum leiðum, sem er um þrír milljarðar króna á ári, en megin tilgangur framkvæmdanna er að auka öryggi og greiða fyrir uppbyggingu samgöngumannvirkja. Talið er að kostnaður verði kringum 56 milljarðar með virðisaukaskatti og er þá ekki tekið með í dæmið kostnaður við Sundabraut. Þá er líkt og ráðherra lagði upp með þegar hann skipaði starfshópinn, lagt til að framkvæmdirnar verði að fullu fjármagnaðar með veggjöldum til tuttugu ára en að þeim tíma liðnum falli innheimta niður. Gert er ráð fyrir að hægt verði að hefja framkvæmdir við hluta þessara leiða strax á næsta ári og að framkvæmdatíminn verði allt að átta ár. Innheimta veggjalda hefjist um svipað leyti og framkvæmdir hefjist. Starfshópurinn gerði ráð fyrir því að framkvæmdirnar yrðu utan samgönguáætlunar og fjármagnaðar með lánum til allt að 20 ára. Þetta geri það að verkum að aukið svigrúm verði til annarra brýnna framkvæmda í samgöngubótum annarsstaðar á landinu. Þá er ekki gert ráð fyrir að innheimt verði veggjöld af umferð innan höfuðborgarsvæðisins. Nú hafa tillögur starfshóps Jóns Gunnarssonar verið kynntar og kemur það í hlut stjórnmálamanna eftir kosningar í haust að ákveða hvort farið verður eftir tillögum starfshópsins, eða þær lagðar í skúffu. Skýrsla starfshópsins
