Samkvæmt samantekt Hagstofunnar er vísitala neysluverðs í september á þessu ári 444,6 stig og hækkar um 0,14% frá fyrra mánuði. Vísitala neysluverðs án húsnæðisliðar er hins vegar 383,7 stig og lækkar um 0,21% frá ágúst 2017. Þetta þýðir að lán heimila og fyrirtækja hækka vegna þess að húsnæði í landinu hefur hækkað í verði.

Kostnaður vegna búsetu í eigin húsnæði hækkar um 1,2% milli mánaða, samkvæmt samantekt Hagstofunnar, og hefur áhrif til hækkunar vísitölunnar um 0,24 prósentustig og föt og skór hækka um 6%. Flugfargjöld til útlanda lækka hins vegar um 18,8% milli mánaða og matur og drykkjarvörur um 1,3%.. Síðastliðna tólf mánuði hefur vísitala neysluverðs hækkað um 1,4% en vísitalan án húsnæðisþáttarins hefur lækkað um 3,1%.

„Ofbeldi gegn heimilum“

Vilhjálmur Birgisson formaður Verkalýðsfélags Akraness er sá einstaklingur sem harðast hefur gagnrýnt þessa reikniaðferð stjórnvalda að hafa húsnæðisliðinn inn í verðgrunni neysluvísitölu. Segir hann Íslendinga vera einu þjóðina í Evrópu sem geri slíkt og eru það einkum skuldsett heimili og einstaklingar sem tapa, en fjármagseigendur græði. Vilhjálmur skrifar í dag: „Jæja, ofbeldið gegn íslenskum heimilum og almenningi heldur áfram af fullum þunga og þetta ofbeldi er með fullri vitneskju þeirra sem starfa á Alþingi. Ég hef í mörg ár fjallað um það að það er ekki bara að við Íslendingar séum nánast eina þjóðin í heiminum sem þarf að þola það að skuldir almennings og heimila séu verðtryggðar heldur þurfum við líka að þola það að verðbólgan hér á landi er mæld með öðrum hætti en í þeim löndum sem við viljum bera okkur saman við en hér er ég að tala um að við erum með svokallaðan húsnæðislið inni í mælingunni á hækkun á neysluvísitölunni,“ skrifar Vilhjálmur.

Vísitala neysluverðs hækkar þar sem húsnæðisliðurinn er hafður með