Í næstu viku, fimmtudaginn 5. október, er væntanleg úr prentun bókin „Leiðin frá Langanesi – suður í höf og heim aftur, veraldarsigling Jóns Eggertssonar.“ Sölvi Sveinsson skráði.

„Við systkinin erum að gefa út bók um pabba okkar Jón Eggertsson, læknisson og fyrrverandi kaupmann í Borgarnesi. Bókin fjallar um æskuárin hans á Þórshöfn, veraldarsiglingar í 14 ár og minningar okkar með honum í Borgarnesi. Pabbi hefur nú ekkert verið að flíka sögunum af veraldarsiglingum sínum á sínum yngri árum. Það var reyndar þannig þegar við vorum yngri að læra landafræði eða sögu og þurftum að spyrja pabba um eitthvað sem tengdist útlöndum þá kom alltaf: „Já, ég var nú þarna.“ Þá fór maður að spyrja meira og alltaf hafði hann komið á þá staði sem við nefndum. Núna í seinni tíð þegar við systkinin erum að flækjast eitthvað um heiminn þá koma sögur af því þegar hann var þar og við verðum að koma við þarna og þarna. Hann er ótrúlega minnugur,“ segir Jóhanna Erla Jónsdóttir dóttir hans í samtali við Skessuhorn.

Á bókarkápu segir: „Í þessari bók segir Jón Eggertsson sögu sína, en hann fæddist og ólst upp í Þórshöfn á Langanesi, fluttist síðan suður á unglingsaldri 1941, var á síld fyrir norðan á sumrin en við þorskveiðar í Vestmannaeyjum á vetrum. Hann réði sig á færeyska skútu 1948, einn túr sem endaði í Færeyjum, en þar vantaði mann á norskt tankskip. Hann sló til og kom ekki heim næstu 14 ár, sigldi um öll heimsins höf. Jón er minnugur í betra lagi og kjarnyrtur. Fyrri hluti bókarinnar er helgaður frásögn hans af Þórshafnarárunum þar sem fléttað er inn skýrslum Eggerts Einarssonar héraðslæknis, föður hans, en þær eru upplýsandi um menn og málefni á Langanesi og víðar. Einnig eru kaflar úr hreppsbók Langaneshrepps og aðrar heimildir sem varpa ljósi á byggðamál og afkomu fólks, ekki síst á kreppuárunum. Í bókarlok eru æskuminningar Jóhönnu Erlu Jónsdóttur, en heim kominn settist Jón að í Borgarnesi og rak þar efnalaug og verslun um árabil.“ Í Borgarnesi eignaðist Jón sjö börn en átti eitt fyrir.

Bókin er gefin út í takmörkuðu upplagi og seld í forsölu á facebook og í gegnum pantanir á netfangið johannaerla74@gmail.com

Veraldarsigling Jóns Eggertssonar á prent