Nú er menningarveturinn að hefjast og við byrjum hann á því að frumsýna nýja sýningu á Söguloftinu: Auður djúpúðga – sagan öll. Það er hinn vinsæli rithöfundur Vilborg Davíðsdóttir sem hér stígur á stokk en hún lýkur í haust þríleik sínum um konuna sem á engan sinn líka í landnámssögunni með sjálfstæðri bók um siglinguna yfir hafið og þessari sýningu á Sögulofti Landnámssetursins í Borgarnesi.

Í Laxdælu segir um ævintýralegan flótta Auðar Ketilsdóttur frá Skotlandi til Íslands með sjö sonarbörn sín: „Þykjast menn varla dæmi til vita að einn kvenmaður hafi komist í brott úr þvílíkum ófriði með jafnmiklu fé og föruneyti. Má af því marka að hún var mikið afbragð annarra kvenna.“

Vilborg fer með áhorfendur í ferðalag um slóðir Auðar á Bretlandseyjum og í kjölfar hennar til eylandsins á enda veraldar þar sem ár og vötn voru sögð iða af fiski, jökulhettur gnæfa við himin og sjálf jörðin spúa eldi. Saman við viðburðaríkt líf Auðar á Írlandi og Skotlandi fléttast atburður sem markaði upphaf landnámsins blóði: þrælauppreisn á suðurströnd Íslands.

Nýja skáldsaga Vilborgar nefnist Blóðug jörð en þær fyrri, Auður og Vígroði, hlutu fádæmagóðar viðtökur lesenda og gagnrýnenda og var Auður tilnefnd til Íslensku bókmenntaverðlaunanna. Vilborg hlaut einnig mikið lof fyrir síðustu bók sína, Ástina, drekann og dauðann, og fjöldi fólks um land allt hefur hlýtt á fyrirlestra hennar um gjafir sorgarinnar.

Sýningar á Auði djúpúðgu hefjast á Söguloftinu þann 14. október og standa fram í nóvember. Miðapantanir og nánari upplýsingar í Landnámssetri Íslands, Borgarnesi, sími 437-1600.

Eftir áramótin verða Guðmundur Andri Thorsson og Einar Kárason með nýjar sýningar á Söguloftinu. Að þessu viðbættu munu tónleikar og alls konar skemmtilegar uppákomur dreifast hér og þar yfir veturinn. Endilega fylgist með viðburðum okkar á samskiptamiðlum og á heimasíðunni okkar landnam.is.

-fréttatilkynning

Spennandi vetur framundan í Landnámssetrinu