Búnaðarsamband Húnaþings og Stranda og Félag sauðfjárbænda í Skagafirði hélt í gær opinn umræðufund á Blönduósi um stöðu og málefni sauðfjárbænda. Fjölmenni var á fundinum og einkum rætt um áhrif verðfalls á sauðfjárafurðum í haust. Þar mættu auk bænda forsvarsmenn bænda, afurðastöðva auk stjórnmálamanna. Þrír þingmenn NV kjördæmis mættu; Teitur Björn Einarsson, Lilja Rafney Magnúsdóttir og Guðjón Brjánsson.

„Staðan er grafalvarleg,“ segir Sigurður Ingi Jóhannsson fv. landbúnaðarráðherra og formaður Framsóknarflokksins í bloggi sínu um stöðu sauðfjárbænda. „Ef ekki verður gripið inn í þá horfa sauðfjárbændur fram á allt að 56% launalækkun. Enginn sættir sig við það. Aðrar stéttir hafa hækkað um 30-35% í launum á sama tíma. Afleiðingarnar að óbreyttu verða algjör forsendubrestur á rekstri sauðfjárbúa, fjöldi ungra bænda með börn mun missa heimili sín og atvinnu, byggðaröskun verður með tilheyrandi áhrifum á ímynd lands og þjóðar og fjöldi fólks í þéttbýli missir vinnu. Bein og óbein störf í landbúnaði eru 10-12 þúsund,“ segir Sigurður Ingi.

Hann segir að ríkisstjórnin verði að hætta aðgerðaleysi og pólitískum sandkassaleik í þessum efnum. Heimili og lífsviðurværi fólks sé í veði. Auk þess segir Sigurður Ingi að taka verði upp útflutningsskyldu að nýju og horfa til annarra landa í þeim efnum, þar með talið ESB landa. „Önnur inngrip á markaði þarf auk þess að skoða,“ segir fyrrverandi landbúnaðarráðherra.

Segir ríkisstjórnina þurfa að hætta öllum sandkastalaleik