Meðfylgjandi mynd er skjáskot af auglýsingu á heimasíðu verslanakeðjunnar Nettó. Verslunin býður nú lambalæri á 794 krónur kílóið, en það jafngildir 47% verðlækkun. Fastlega er búist við að svipuð tilboð fylgi í kjölfarið hjá fleiri verslunum. Þess má þó geta að kílóið af lambalæri var í gær á 1.850 krónur í Costco í Garðabæ svo þar á bæ taka menn enn sem komið er ekki þátt í gylliboðum til neytenda. Sindri Sigurgeirsson formaður Bændasamtaka Íslands finnst lítið til þessa koma hjá Nettó, að verslanakeðja í krafti stærðar sinnar, krefji afurðastöð um verðlækkun þegar vitað er að kjötbirgðir séu miklar. „Afurðastöð með miklar birgðir og erfiðan rekstur lætur undan þrýstingi,“ skrifar Sindri á Facebook síðu sína.

„Ættu frekar að taka stöðu með bændum“

„Í fimm mánuði höfum við forsvarsmenn bænda verið í viðræðum við stjórnvöld um aðgerðir til að koma í veg fyrir uppnám á kjötmarkaði með tilheyrandi afkomubresti hjá íslenskum sauðfjárbændum. Þær viðræður hafa ekki enn skilað árangri. Ráðherra landbúnaðarmála hefur ítrekað sagt í fjölmiðlum að ekki sé í boði að beita inngripum í markaðinn, hagsmunir neytenda séu ofar öllu,“ skrifar Sindri. „Þessi mynd staðfestir allt sem við höfum varað við. Það er næsta augljóst að aðrar verslanir munu fylgja í kjölfarið. Niðurstaðan verður verðfall á kjötmarkaði. Vissulega verður tímabundin veisla fyrir okkar ágætu neytendur en reikningurinn fyrir þessum afsláttum verður sendur beint á bændur. Afleiðingin verður áframhaldandi verðlækkun til bænda með tilheyrandi gjaldþrotum og byggðaröskun,“ skrifar formaður Bændasamtaka Íslands. „Smásöluverslun á Íslandi ætti að íhuga það að taka stöðu með bændum við þessar erfiðu aðstæður. Í heiðarlegum viðskiptum þurfa einfaldlega allir í virðiskeðjunni að fá sanngjarnan hlut,“ skrifar hann í lokum færslu sinnar.

Kjötveislan mikla er hafin – Nettó býður kjöt undir kostnaðarverði