Knattspyrnusumarið hefur fram til þess verið nokkuð erfitt fyrir Vesturland. Skagamenn sitja á botni Pepsideildar karla með tíu stig eða sex stigum á eftir næsta liði, Víkingur Ólafsvík er þremur stigum frá fallsæti í sömu deild. Þá er útlitið fremur dökkt hjá kvennaliði Víkings Ólafsvíkur sem er í næstneðsta sæti fyrstu deildar kvenna, sex stigum frá því að komast úr fallsæti þegar níu stig eru eftir í pottinum.

Öll eiga þessi lið leiki um helgina og er það ekki orðum ofaukið að mikilvægi leikjanna er gríðarlegt. Skagamenn mæta Breiðabliki á sunnudaginn í Kópavogi. Í upphafi viku sagði Gunnlaugur Jónsson starfi sínu lausu hjá ÍA eftir að honum var greint frá að ekki hafi verið einhugur um hann í stjórn félagsins. Jón Þór Hauksson, fyrrum aðstoðarmaður Gunnlaugs, hefur nú tekið við starfinu og Ármann Smári Björnsson fyrrum fyrirliði ÍA ráðinn honum til aðstoðar. Þá eiga þeir Sigurður Jónsson og Þórður Guðjónsson að vera þeim innan handar. Skagamenn töpuðu gríðarlega mikilvægum leik gegn ÍBV síðastliðinn föstudags og verður róðurinn alltaf þyngri og þyngri eftir sem biðin eftir sigurleik lengist.

Víkingur Ólafsvík mætir liði KA á sunnudaginn í Pepsideild karla og fer leikurinn fram á Akureyri. Í fyrri leik liðanna steinlá Víkingur 4-1 fyrir Akureyringum þar sem Emil Lyng skoraði þrennu. Víkingur hefur náð í góð úrslit síðastliðinn mánuð og sigur á Akureyri gæti þýtt það að liðið ætti möguleika á blanda sér í baráttu um Evrópusæti í lok móts en tapa þýðir einfaldlega blóðug botnbarátta.

Mikilvægasti leikur helgarinnar er þó án vafa leikur Víkings Ólafsvíkur gegn ÍR í fyrstu deild kvenna í kvöld á ÍR-velli klukkan 18:00. Tapi Víkingur leiknum gæti farið svo að liðið falli ef önnur úrslit verða óhagstæð en með sigri verða möguleikar enn til staðar þegar tveir leikir eru eftir.

Gríðarlega mikilvæg helgi fyrir Vesturlandsliðin