Dagana 25.-27. ágúst fer fram hátíðin Hvalfjarðardagar með veglegri dagskrá. Hátíðin hefur verið haldin frá 2008 en frá 2012 í þeirri mynd sem hún er í dag. „Hátíðin hefur vaxið og dafnað í gegnum árin. Fyrst var um að ræða einn dag en nú er þétt dagskrá alla helgina. Í ár verður hátíðin blanda af hefðbundnum dagskrárliðum og nýjum. Hátíðin hefur alltaf verið hugsuð sem endahnúturinn á sumrinu og lagt er upp með að sveitungar sameinist og skemmti sér saman á fjölskylduvænni hátíð en að sjálfsögðu bjóðum við alla velkomna að gleðjast með okkur,“ segir Ása Líndal forsvarsmaður Hvalfjarðardaga í samtali við Skessuhorn.

Dagskrá Hvalfjarðardaga er fjölbreytt og ættu allir að finna eitthvað við sitt hæfi. Alla helgina verður ljósmyndasamkeppni þar sem þemað verður gleði og náttúra í Hvalfjarðarsveit. Þeir sem taka þátt í keppninni þurfa að senda myndirnar á heimasíðu hátíðarinnar (hvalfjardardagar@hvalfjardarsveit.is) og verður tilkynnt um sigurvegara eftir úrskurð dómara í lok hátíðarinnar. Það verður einnig keppni um best skreyttu heimreiðina í sveitinni og dómnefnd verður á sveimi um helgina til að velja sigurvegara í þeirri keppni.

Á föstudaginn býður Laxárbakki til veislu þar sem lambakjöt verður á grillinu og fólki gefst tækifæri að skoða aðstæður á staðnum, en nýlega tóku nýir eigendur við rekstrinum. Þá sýna BMX-brós listir sínar að Hlöðum áður en slegið verður upp sundlaugarpartýi.

Laugardagurinn hefst með gönguferð með leiðsögn Petrínu Helgu Ottesen úr Grafardal um Síldarmannagötur niður í Hvalfjörð. Gengnir verða 13,5 kílómetrar og er áætlað að gangan taki um fjórar klukkustundir. Þá stendur Sjóbaðsfélag Akraness fyrir svokölluðu Helgusundi þar sem synt verður úr Geirshólma í land í Helguvík. Sundið er kennt við Helgu konu Harðar Grímkelssonar sem Harðar saga og Hólmverja er kennd við. Segir í sögunni að hún hafi synt úr Geirshólma að landi og gengið yfir í Skorradal með tvo drengi sína á flótta. Opið hús verður hjá hestaleigu Draumhesta í Steinsholti og teymt verður undir börnum. Einnig verður Hernámssetrið opið. Á Þórisstöðum verður svo heilmikil dagskrá þar sem m.a. verður stóri sveitamarkaðurinn þar sem til sölu verður fallegt handverk og góður matur, Leikhópurinn Lotta kemur fram, trúbador verður á svæðinu ásamt vatnsrennibraut og keppt verður í traktoraþrautabraut. Dagskránni á laugardaginn lýkur svo með tónleikum Fjárlaganefndarinnar í Hallgrímskirkju í Saurbæ.

Á sunnudaginn verður opið hús í skógræktinni Álfholtsskógi og Vatnaskógur býður fólki í heimsókn þar sem verður mikið húllumhæ. Hvalfjarðardögum lýkur svo með stofutónleikum á Skipanesi þar sem Ásta Marý Stefánsdóttir mun flytja uppáhaldslögin sín.

„Það hefur verið gaman að taka þátt í skipulagningu Hvalfjarðardaga. Það hafa allir verið jákvæðir og hjálpsamir sem maður hefur haft samband við varðandi hátíðina. Maður finnur að það er komin tilhlökkun í fólk fyrir komandi helgi og ég býst við að það verði mikið líf og fjör í sveitarfélaginu um helgina,“ segir Ása að endingu.

Hvalfjarðardagar verða haldnir um helgina