Dagana 17. – 20. ágúst fer bæjarhátíðin Danskir dagar fram í Stykkishólmi. Þessi rótgróna hátíð er nú haldin í 23. sinn. Brottfluttir Hólmarar nýta tækifærið og heimsækja vini og ættingja í Hólminn og fjölskyldur sameinast þessa ágústdaga. Hjördís Pálsdóttir, forstöðumaður Norska hússins – Byggðasafns Snæfellinga og Hnappdæla, er framkvæmdastjóri hátíðarinnar í ár. „Ég fékk í lið með mér sex ungar konur hér úr Hólminum við skipulagningu hátíðarinnar og hefur undirbúningurinn gengið mjög vel. Það var strax lagt upp með það í vor að dagskráin yrði sem mest heimagerð, eitthvað í boði fyrir alla og þá sérstaklega ungu kynslóðina,“ segir Hjördís í samtali við Skessuhorn. Hér verður stiklað á stóru um það helsta sem í boði verður:

Á föstudaginn verður meðal annars hjólaferð og vígsla á ærslabelg, sem verið er að koma fyrir í Hólminum. Hátíðin verður svo formlega sett kl. 21:00 við Flæðisker (minnisvarða sjómanna), strax að loknum hverfagrillum og lýkur setningunni með fjörugum brekkusöng.

Á laugardaginn verður svo nóg um að vera; dorgveiðikeppni, fótboltamót, Aksjón Lions manna, búningahlaup og skemmtilegur fjölskylduþrautaleikur. Norska húsið býður upp á heitar eplaskífur og brjóstsykursgerð, auk þess sem markaðssvæði verður fyrir utan safnið. Um kvöldið verður svo bryggjuball sem endar með flugeldasýningu. Hljómsveitin Buff mun svo halda upp stuðinu með stórdansleik í Íþróttamiðstöð Stykkishólms.

Á sunnudaginn er gönguferð upp á Drápuhlíðarfjall og félagsvist á Dvalarheimili aldraðar. Hægt er að nálgast dagskrána á Facebook síðu Danskra daga og á heimasíðu hátíðarinnar, danskirdagar.stykkisholmur.is.

„Það er tilhlökkun í bæjarbúum, það verður líf og fjör í Hólminum alla helgina, allir velkomnir og við tökum á móti gestum með bros á vör,“ segir Hjördís að endingu.

Danskir dagar að hefjast í Stykkishólmi