Blásið verður til sannkallaðrar tónlistarhátíðar í félagsheimilinu Brún í Bæjarsveit á morgun, fimmtudaginn 17. ágúst, en þá mun hljómsveitin „Key to the Highway“ heiðra tónlistarmanninn Eric Clapton með tónleikum. Eric Clapton félag Borgarfjarðar er stuðningsaðili tónleikanna. Haukur Júlíusson á Hvanneyri , sem léð hefur Clapton eyra í hálfa öld, er einn skipuleggjenda tónleikanna. „Grunnurinn að þessum tónleikum er í raun sá sami og fyrir tveimur árum, þegar blásið var til heiðurstónleika Eric Clapton tónlistar- og veiðimanns í tilefni af sjötugsafmæli kappans,“ segir Haukur í samtali við Skessuhorn. „Þá varð til þessi sjö manna sveit og nú stendur til að verði einn til viðbótar á sviðinu,“ segir hann. „Sem stendur er hann leynigestur og ég vil því ekki nefna nafn hans fyrr en á staðnum,“ bætir Haukur við.

Kanónur á öllum sviðum

Hljómsveitina „Key to the Highway“ skipa fimm ungir tónlistarmenn af Stór-Borgarfjarðarsvæðinu; Reynir Hauksson gítarleikari á Hvanneyri, Heimir Klemenzson hljómborðsleikari frá Dýrastöðum, söngvarinn Heiðmar Eyjólfsson frá Hlíð í Hvalfirði og bræðurnir á Varmalæk, þeir Ásmundur Sigurðsson bassaleikari og Jakob Grétar Sigurðsson trommuleikari. Í lávarðadeild hljómsveitarinnar eiga síðan sæti þeir Gunnar Ringsted, gítarleikari og tónlistarkennari í Borgarnesi og Ólafur Garðarsson trommuleikari, sem leikið hefur með mörgum af þekktustum hljómsveitum íslenskrar rokksögu. „Þegar tónleikarnir fyrir tveimur árum voru í undirbúningi, vorum við að ræða þetta ég, Reynir og Varmalækjarbræður. Ég man ekki alveg hvernig það æxlaðist en mér datt í hug að orða við gamlan félaga minn, Ólaf Garðarsson Óðmann, Trúbrotsmann og Náttúrumann, hvort hann vildi ekki bara koma og spila með strákunum. Þá hafði hann ekki komið fram í áratugi og drengirnir eðlilega mjög spenntir. Ólafur er nú hógvær og hlédrægur maður og leist hóflega vel á þetta fyrirfram. En hann tók með þeim æfingu í FÍH salnum og náði góðum kontakt við strákana og ákvað að slá til,“ segir Haukur. „Það sem gerir þetta band dálítið merkilegt er að hafa bæði Ólaf Garðarsson og Gunnar Ringsted, en þeir skipa báðir stóran sess í íslenskri rokksögu. Síðan er nú ekki á hverjum degi sem hljómsveitir skarta tveimur trommuleikurum. En það setur skemmtilegan svip á bandið. Þeir halda hvor öðrum við efnið, peppa hvorn annan upp og þannig verður það nú sem fyrr,“ bætir hann við.

Þar sem Clapton hefur komið við sögu

Haukur upplýsir að opnunarlag tónleikanna sé gamall blússtandard úr smiðju Bill Bronzy, lagið Key to the Highway, sem hljómsveitin kennir sig við. Segir hann það líklega verða í búningi í ætt við þá útgáfu sem Keith Richards hefur flutt með Clapton. „Hann hefur spilað þetta lag með Clapton á tónleikum á sinn sérstaka hátt. Hann er nú kannske ekki sá allra fimasti að hitta alltaf á réttu strengina en þetta gerir hann vel og lagið syngur hann andskoti vel,“ segir hann. „Efnistökin eru í sjálfu sér þau sömu að grunninum til og fyrir tveimur árum síðan, en að þessu sinni verður einnig leitað fanga þar sem Clapton hefur komið við sögu án þess að vera í aðalhlutverki. Þannig verða á efnisskránni nokkur lög frá Allman Brothers Band, JJ Cale og Bob Dylan. Sem sagt ekki allt lög þar sem Eric er miðdepillinn þó áhersla verði lögð á gullaldartímabil hans beggja megin við 1970 þegar hljómsveitin Derek and the Domino‘s var upp á sitt besta,“ segir Haukur.

Sannkölluð rokkveisla

Á heiðurstónleikum Claptons fyrir tveimur árum síðan brá Haukur sér í hlutverk kynnis á tónleikunum en kveður óvíst að svo verði nú, að minnsta kosti ekki með sama hætti og síðast. „Ef ég hef einhverja rödd til þess þá ætla ég að segja nokkur orð, en án þess þó að trufla framvindu mála of mikið. Músíkin verður í aðalhlutverki. En hún verður ekki til af engu, hún sprettur upp úr umhverfinu og aðstæðum. Hefðu Eric Clapton og Duane Allman aldrei hist í fyrsta sinn á tónleikum þess síðarnefnda hefði Derek and the Domino‘s kannski aldrei orðið til, né stór hluti þess efnis sem verður á efnisskránni í Brún og framvindan kannski allt önnur. Ég reyni kannski að hafa um þessi mál nokkur orð en fremst verður þetta rokkveisla frá gullaldarárum Claptons,“ segir Haukur að endingu.

„Þetta verður rokkveisla frá gullaldarárum Claptons“