Dagarnir 10.-13. ágúst verða sannkallaðir tónlistardagar á Akranesi. Fimmtudaginn 10. ágúst mun Sigurður Flosason og Tríó Lars Jansson halda tónleika í Vinaminni kl. 20. Leikin verða lög af nýjum diski Sigurðar; „Green Moss Black Sand“. Á honum eru ellefu ný lög eftir Sigurð flutt af honum og tríói sænska píanóleikarans Lars Jansson. Daninn Thomas Fonnesbæk leikur á kontrabassa og hinn sænski Paul Svanberg á trommur. Lars Jansson er 65 ára og almennt talinn einn af fremstu jazzpíanóleikurum Norðurlanda.

Föstudaginn 11. ágúst kl. 20, verða þær Helga Kvam píanóleikari og Þórhildur Örvarsdóttir söngkona í Vinaminni. Flytja þær íslenkar söngperlur og er efnisskráin mjög fjölbreytt. Þórhildur og Helga eru þekktar fyrir einstakan samhljóm og skemmtilega sviðsframkomu og lofa góðri kvöldstund.

Sama kvöld, kl. 20, verða einnig tónleikar í Dularfullu búðinni. Þar kemur fram hljómsveitin Rökkva. Rökkva spilar létta og kósý tónlist með píanóspili, fiðlum og röddum. Laugardaginn 12. ágúst kl. 12.30 verða tónleikar í Vinaminni sem bera yfirskriftina Ástin í ágúst. Kalman og vinir syngja um ástina. Sérstakur gestur er Páll Rósinkrans söngvari. Silkimjúk stemning í rómantískum ágústmánuði.

Þessum tónlistardögum líkur svo sunnudaginn 13. ágúst kl. 20.30. Þá mun gítardúóið Linü halda tónleika í Akranesvita. Dúóið er skipað þeim Gulla Björnssyni og Jiji Kim. Þau spila mjög fjölbreytta efnisskrá og eru þar virkilega spennandi listamenn á ferð.

„Spennandi dagar framundan, frábærir listamenn sem bjóða upp á flotta viðburði,“ segir í tilkynningu.

Aðgangseyrir inn á tónleikana í Vinaminni er kr. 2.500 en Kalmansvinir greiða kr. 1.000.

Eftir Versló – Sumartónleikar framundan á Akranesi